मातृभाषा साहित्य प्रतिष्ठान नेपाल द्वारा मातृभाषा सम्मान कार्यक्रममा नेपालभाषाका तीनजना ज्येष्ठ नागरिक स्रष्टालाई ‘मातृभाषा- सम्मान’ प्रदान गरिएको छ । सम्मानित हुनेमा पहिलो आधुनिक कवि नारायणदेवी श्रेष्ठ, पहिलो नारी कथाकार प्रकाशकुमारी प्रधानाङ्ग र संस्कृतिविद् तथा अन्वेषक काशीनाथ तमोट छन् ।
नेपालभाषाका जनकवि दुर्गालाल श्रेष्ठ,मातृभाषा साहित्य प्रतिष्ठानकी अध्यक्ष सुलोचना मानन्धर धिताल र नारी स्रष्टाहरूको संस्था गुञ्जनकी अध्यक्ष जलेश्वरी श्रेष्ठले संयुक्तरूपमा उक्त सम्मान प्रदान गरेका हुन् । सम्मानको राशि जनही २५ हजार रुपियाँ रहेको छ ।
विसं.१९९१ म काठमाडौंको कमलाछीमा जन्मिएकी नारायणदेवीको २०१४ सालमा ‘मुखूस्वां’ (कोपिला) कवितासङ्ग्रह प्रकाशित भएको थियो । यो कृति नेपालभाषाको आधुनिक कविताकृतिका रूपमा स्थापित छ ।
त्यसैगरी पाल्पाको तानसेनमा विसं. १९९४ मा जन्मिएकी प्रकाशकुमारी नारीवादको आवाज उठाउने पहिलो कथाकार तथा नाटककार हुन् । उनका ‘मस्याङ्पा’, ‘लुफिं’, ‘प्रतिज्ञा’ र ‘अपवाद’ कथासङ्ग्रह र ‘कलाकार’ नाटकसङ्ग्रह लगायत पुस्तक प्रकाशित छन् ।
भोजपुरको टक्सारमा विस.२००१ सालमा जन्मिएका संस्कृतिविद् काशिनाथको नेपालभाषा, नेपाली र अङ्ग्रेजीमा दर्जनौँ कृति प्रकाशित छन् ।
कार्यक्रममा सम्मानित स्रष्टाका योगदानबारेमा दिव्या ताम्राकारले चर्चा गरेकी थिइन् ।
