कवि तथा गजलकार बाबु त्रिपाठीको गजलसंग्रह ‘बा’ र कवितासंग्रह ‘सालिकहरूको देश’माथि विमर्श सम्पन्न भएको छ ।
शुक्रबार सर्वनाम थिएटरमा आयोजित कार्यक्रमकवि तथा गजलकार बाबु त्रिपाठीको गजलसंग्रह ‘बा’ र कवितासंग्रह ‘सालिकहरूको देश’माथि विमर्श सम्पन्न भएको छ । कार्यक्रमको प्रारम्भमा बाबुको एउटा कवितामाथि नाट्य मञ्चन गरियो ।
त्यसपछि विमर्श कार्यक्रममा सर्जकहरू ज्योति जंगल, डा. दीपक खडका र कृतिकार त्रिपाठीले कृतिका बारेमा आफ्ना धारणा राखे ।
डा. खडकाले बाबुले गजलमा नयाँ पात्र सिर्जना गरेको चर्चा गर्दै उनका काव्यमा चेतना र दर्शन भरिएको बताए । बाबुका रचनामा प्रेमदेखि मृत्यु चिन्तनसम्म समेटिएको उनको भनाइ रह्यो ।
कवि ज्योति जंगलले बाबुका कवितामा चेतनाको उच्चतम विन्दु भेटिने उल्लेख गर्दै आफूले बाबुका कवितामा एउटा योद्धा बोलिरहेको बताइन् । देशलाई माया गर्ने कवि बाबु भएको बताउँदै उनका कवितामा मानवीय चेत भरिएको उल्लेख गरिन् । उनले भनिन्, “बाबुले कवितालाई पनि गजलमा ल्याएका छन् ।”
रंगकर्मी राज शाहद्वारा सहजीकरण गरिएको कार्यक्रममा कवि त्रिपाठीले आफ्नो कविता लेखनबारे बताए ।
