कम्युनिस्ट नेता भ्लादिमिर इल्यिच लेनिनको स्मृतिमा नेपालमा वर्षभरि नै कार्यक्रम गर्ने अभियान घोषणा भएको छ । ‘लेनिन स्मृति शतवार्षिकी’ मूल आयोजक समितिले आइतबार काठमाडौंमा पत्रकार सम्मेलन गरी सातै प्रदेशका विभिन्न सहरमा गरिने २० भन्दा बढी कार्यक्रमहरुको तालिका सार्वजनिक गरेको हो।
काठमाडौं, विराटनगर, धरान, पोखरा, बुटवल, दाङ, नेपालगञ्ज, सुर्खेत, धनगढी, बागलुङलगायत सहरमा विचार–गोष्ठी, अन्तर्क्रिया र सांस्कृतिक कार्यक्रम गर्ने तालिकामा उल्लेख छ ।
‘लेनिनको मृत्यु भएको सय वर्ष भएको सन्दर्भ पारेर हामीले उहाँका विचार, योगदान र शिक्षाहरुका बारेमा गोष्ठी, सांस्कृतिक कार्यक्रम, प्रकाशन गरेर मनाउने छौं’, शतवार्षिकी समितिका संयोजक तथा माक्र्सवादी चिन्तक निनु चापागाईंले भने, ‘हामी काठमाडौंबाहिर मुख्यमुख्य सहर र प्रदेश राजधानीहरुमा पनि कार्यक्रम गर्नेछौं ।’
चापागाईंले २२ अप्रिलमा काठमाडौंमा दुई दिने ‘अन्तर्राष्ट्रिय लेनिन सेमिनार’ आयोजना गरिने पनि बताए । समितिले अन्तर्राष्ट्रिय सेमिनारमा भारत, चीन र बंगलादेशका लेनिनवादी तथा लेनिनविज्ञ विद्वानहरुको सहभागिता हुने जनाएको छ।
पत्रकार सम्मेलनमा बोल्दै समितिका सदस्य तथा माक्र्सवादी अर्थशास्त्री हरि रोकाले भने, ‘नेपालमा लेनिनलाई सम्झनु भनेको नेपाली समाजका सन्दर्भमा आजका राजनीतिक संकटको निकास खोज्नु हो । आजको समाजवादी क्रान्तिका बारेमा चिन्ता गर्नु हो।’
शतवार्षिकी समितिले लेनिनका प्रमुख रचना ‘के गर्ने ?’, ‘राज्य र क्रान्ति’, ‘साम्राज्यवादः पुँजीवादको चरम अवस्था’, ‘भौतिकवाद र अनुभवसिद्ध आलोचना’, ‘माक्र्स र माक्र्सवाद’, ‘अप्रिल थेसिस’ लगायतका पुस्तकहरु पनि अनुवाद तथा पुनःप्रकाशन गर्ने जनाएको छ । वर्षभरिको कार्यक्रम व्यवस्थापन गर्न आर्थिक समिति, प्रकाशन समिति, युवा समन्वय समिति, सांस्कृति समिति गठन गरिएको छ।
पत्रकार भेटघाटमा संयोजक निनु चापागाईंले ‘लेनिनः सयबर्से सम्झना’ शीर्षकको स्मृति–अपिल पनि वाचन गरेर सुनाएका थिए । १९ सदस्यीय शतवार्षिकी समितिमा नारायण ढकाल, डा. अमर गिरी, मित्रलाल पंज्ञानी, रोशन जनकपुरी, तुल्सीदास महर्जन, कल्पना चिलुवाल, वन्दना ढकाल, मुकेशचन्द्र राजभण्डारी, कुमार उपाध्याय, घनश्याम शर्मा पौड्याल, जीवन शर्मा, सङ्गीत, ललितजन रावल, प्रमोद धिताल लगायत छन् ।
