आधा शताब्दीयता नेपाली कला जगत्मा प्रयोगशील र मौलिक सिर्जना लिएर छाइरहेकी कलाकार प्रमिला गिरि आफ्ना पछिल्लासहितका कला सिर्जनाको सँगालो लिएर नेपाल आर्ट काउन्सिलमा प्रदर्शनीमा आएकी छन् ।
पछिल्ला वर्षमा नर्वेमा बस्दै आएकी प्रमिला यसपटक भने इतिहासदेखिका आफ्ना कलाको संग्रह र विशालनगरस्थित निवासमा मूर्ति–बगैंचा बनाउने ध्याउन्नमा केन्द्रित भएर आफ्नै नामको फाउन्डेसनबाट काठमाडौं उत्रिएकी हुन् ।
नेपाल वायुसेवा निगम परिसरमा राखिएको यति मूर्ति होस् होस् वा राष्ट्रिय बिमा संस्थान सामुको प्रतीकात्मक मूर्ति–उनै प्रमिला गिरिको नामकाम आँखामा उत्रिहाल्छ ।
‘यसपटक भने चित्रकलामा समर्पित रहेर गरिएका पछिल्ला काम तथा कोरोनाकालको तीन वर्षे अवधिमा ध्यानी बनेर गरिएका सिर्जनालाई मैले प्रदर्शनीमा ल्याएकी छु,’ बबरमहलस्थित आर्ट काउन्सिलमा भेटिएकी गिरीले भनिन्–‘विगतमा भैरव मास्क (आकृति)मा कला सिर्जनाको काम गर्दै आएकी थिएँ, यसपटक भने भैरवी(देवी)को अवतारमा आएकी छु ।’
मेरो तेस्रो आँखाबाट शीर्षकमा केही मूर्तिकलाको भैरव प्रतीक, केही पुराना तैलचित्र र भैरवी मास्कका चित्रहरुको प्रदर्शनी कात्तिक पहिलो सातासम्म रहनेछ ।
प्रमिलाका मूर्त–अमूर्त कलामा समेत नेपाली कला–संस्कृतिको जीवन्त भाव चित्रित हुने गरेको आर्ट काउन्सिलका अध्यक्ष सागरशमशेर जबराले बताएका छन् ।
आजभन्दा ७६ वर्षअघि सिराहा, बस्तीपुरमा जन्मिएकी कलाकार प्रमिला विशेषत मूर्तिकलामा नेपाली महिला कलाकारमध्येकै अग्रज मानिन्छन् । ‘म आफू जन्मे–हुर्केको समाज र संस्कृतिमा सबैभन्दा बढी जोडिएकी छु । मैले ईश्वरका आध्यात्मिक र आत्मिक चेतनाका बारे कला सिर्जनामा भिन्न प्रतीकात्मक काम गर्दै आएकोमा यसपटक भने भैरवी–देवीको बिम्बात्मक मास्कलाई आधार बनाएर नयाँ सिर्जना गरेकी छु ।’
कला अन्वेषक सत्यमोहन जोशीले दिएको प्रेरणा र बढाइदिएको भैरव–भैरवीबारेको आध्यात्मिक चेतनका कारण आफ्नो यो प्रदर्शनी स्वर्गीय जोशीमा समर्पित गरेको प्रमिलाले जानकारी दिइन् । प्रदर्शनीमा राखिएका कलाहरु बिक्रीमा भने छैनन् ।
