आख्यानकार ध्रुवचन्द्र गौतमले आफ्नो २९ औं उपन्यास ‘जडाउरी’ प्रकाशनमा ल्याएका छन् । उपन्यासकार गौतमले भने ‘मैले स्वैरकल्पना सहितको आफ्नो आविष्कारी शैलीलाई ‘जडाउरी’मा प्रयोग गरेको छु । शैली एकालाप भए पनि कतिपय स्मृतिमा घटनाक्रमको पछिल्लो कोभिडकालीन कथानकसम्म पनि यसमा जोडिएको छ ।’
सूत्रकथा लेखनका अग्रज स्रष्टासमेत रहेका गौतमले शिखा बुक्स्बाट प्रकाशित ‘जडाउरी’मा सूत्र कथाको विस्तारित रुपको झल्को दिएका छन् ।
२०२४ सालमा ‘अन्त्यपछि’ उपन्यास लेखेर आख्यान जगतमा प्रवेश गरेका ८० वर्षीय गौतमका ‘कट्टेल सरको चोटपटक’, ‘निमित्त नायक’, ‘अप्रिय’, ‘एक सहरमा एक कोठा’, ‘सातो’ लगायतका उपन्यास चर्चित छन् । ‘यो उपन्यासमा एकालाप शैलीमा कथानक विन्यास गरिएकोले संरचना नवीन बनेको छ, आख्याता, नारी पात्र र केही त्यस्ता घटनाहरुको चित्रण जसले पाठकलाई पठनवृत्तमा राखी ध्यान केन्द्रित गर्दछ,’ कथाकार रोशन थापा ‘निरव’ले गौतमको पछिल्लो कृति ‘जडाउरी’ बारे टिप्पणी गरेका छन् ।
आख्यानकार गौतमले उपन्यासमै मदन पुरस्कार (अलिखित, २०४०) र साझा पुरस्कार (२०५७, तथाकथित) पाएका थिए ।
