कलिङ साहित्य महोत्सव’को दोस्रो संस्करण भदौ १५ देखि १७ गतेसम्म आयोजना हुने भएको छ । नेपाल, भारत, भुटान, बङ्गलादेश, श्रीलङ्कालगायत देशका साहित्यकारहरू जमघट हुने यो अन्तर्राष्ट्रिय महोत्सव यशस्वी प्रज्ञा प्रतिष्ठान (नेपाल) र कलिङ लिटररी फेस्टिभल (केएलएफ) भारतको संयुक्त आयोजनामा हुन लागेको हो ।
महोत्सवमा दक्षिण एसियाका साहित्य, कला, सङ्गीत, सिनेमा, पत्रकारिता, पर्यटन, राजनीतिलगायत समसामयिक विषयमा प्रस्तुति र छलफल गरिनेछ ।
आयोजकले प्रेस विज्ञप्ति जारी गर्दै महोत्सवमा विभिन्न देशका तीन सयभन्दा बढी लेखकहरूको सहभागिता रहने जनाएको छ । भारतबाट पद्मश्री हलधर नाग, पद्मश्री सुदर्शन पटनायक, पद्मश्री नीला माधव पाण्डा, पद्मश्री अरुणा मोहन्ती, पद्मश्री अरुणा मोहन्तीजस्ता दिग्गजहरू सहभागी हुनेछन् । यस्तै, प्रख्यात अभिनेत्री तथा लेखिका दिव्या दत्त, दीप्ति नवल, हरहर शम्भो फेम गायिका अभिलिप्सा पाण्डा कार्यक्रमका मुख्य आकर्षणका रूपमा रहेका छन् ।
बलिउड सिनेमामा अभिनय गरेर ख्याती कमाएकी अभिनेत्री मनीषा कोइराला पनि महोत्सवमा सहभागी हुनेछिन् । नेपालबाट सुरक्षा पन्त, गौरी मल्ललगायत अभिनेत्रीहरू महोत्सवमा सहभागी हुँदै छन्।
त्यसैगरी, भुटानका रिन्झिन रिन्झिन, श्रीलङ्काका चमल सञ्जीवा, बङ्गलादेशका असरफ ज्वेलसमेत वक्ताको भूमिकामा उपस्थित हुनेछन् ।
‘शक्ति र भक्ति–सभ्यतागत सम्बन्ध, विश्वव्यापी विचारको केन्द्र नेपाल’लाई केन्द्रीय स्वर बनाइएको महोत्सवको यसै संस्करणबाट १२ विधामा १२ लेखकहरूलाई यशस्वी पुस्तक पुरस्कार प्रदान गर्ने पनि जनाइएको छ ।
