हरि गौतमले वैयक्तिक, आत्मपरक, सामाजिक चिन्तनसहितका बहुपक्षीय विषय समेटेर लेखेको निबन्धसंग्रह ‘कठैबरा काठमाडौं’ सार्वजनिक भएको छ । गौतमले काठमाडौंलाई एउटा उपत्यका, देशकै राजधानी वा उदाहरणीय महानगरका रूपमा मात्रै नचिनाएर इतिहासका पानादेखि मिथक र विभिन्न साहित्यिक—सांस्कृतिक अभिलेखनका आधारमा चिनाउन चाहेका छन् ।
१९ वटा निबन्ध समेटिएको कृतिमा विवाहको अपरिहार्यतादेखि नेपाल—भारत सम्बन्धको आयाम र सम्बन्ध बिच्छेददेखि ज्येष्ठ नागरिकको भाष्यसम्म केलाउदै निबन्धकार गौतमले विषय र चिन्तनको विविधता ‘कठैबरा काठमाडौं’मा समेटेका छन् ।
ओरिएन्टल पब्लिकेसनले प्रकाशित गरेको कृति ‘कठैबरा काठमाडौं’ लाई साहित्यकार नारायण ढकालले ‘यो कृति अध्यन गर्नु भनेको ज्ञानका महासागरमा डुब्नुजस्तै आनन्दको विषय’ भनेर प्रशंसा गरेका छन् । यसअघि लेखक गौतमको ‘नेपाली क्रान्ति र गणेशमान सिंह’ कृति प्रकाशनमा आइसकेको छ ।
