मृत्यु : एक भ्रम, एक यथार्थ

तिम्रो जन्मसँगै तिमीसँगै खेल्दै हुर्किएको हुँ
तिम्रा थुप्रै अपसकुन र जीवनका खड्गोहरुमा
तिम्रो साथ रहँदै आएको हुँ
तिम्रो जीवन मरणका अनगिन्ती दोसाँधहरुमा
तिमीलाई बारम्बार जीवन दान दिइरहेकै पनि हुँ
मेरो प्रिय साथी, तिमी निर्धक्क अघि बढ
म छु, र त तिमीलाई
आफु बाँचेको आभाष भइरहको छ
मानिसहरु, जन्मदेखि नै जीवनको कुरा गर्छन्
म त आफैमा मृत्यु हुँ, ममा जीवन छैन
तिमी मानिसलाई जस्तो, मलाई मृत्युको भय छैन
तिमी मानिसको जस्तो, मेरो कुनै उमेर पनि छैन
म मात्र बोधमा आकार हुँ, नत्र निराकार छु
जन्मकुण्डलीको मारकेशको स्थान
ज्योतिषहरुले अथ्र्याए जस्तो डरलाग्दो पनि छैन
महसुुस गर्न सक्यौ भने, म त्यहिँ बसिरहेको हुन्छु
तर मलाई नखोजे हुन्छ
मृत्युबोध पछि, जीवन भ्रम मात्र लाग्न सक्छ
भ्रममा जीवन यथार्थ हो, जो आकर्षक देखिन्छ
तर जीवन, कुनै पनि बेला टुटन तयार छ
होसमा त मृत्यु यथार्थ हो, जो विकर्षक देखिन्छ
तर मृत्यु, जो प्रत्येक पल साथ लिन तयार छ
कस्तो रहस्यमय –
म भ्रममा बाँचिरहेको बोध, यथार्थ हो कि भ्रम ?
मैले यथार्थ बुझेको बोध, भ्रम हो कि यथार्थ ?
मृत्यु भन्छ –
मैलै तिम्रा कविराजहरुलाई अह्राएको छु
कोशिस गर, तिम्रा ज्ञान र सीपहरु लगाउ
मेरो प्रिय साथीको जीवन बचाउन सक्दो कोशिस गर
तर, जब तिम्रा कविराजहरु हार्नेछन्
मेरो प्रिय साथी, तिमीलाई म
मेरै आरोग्य आश्रममा लिएर जानेछु
नितान्त फरक जीवन र दुनियाँमा लैजानेछु
बस् एक लाऽऽमो, अनन्त यात्राको लागि मानिसहरुलाई
जीवनका भ्रमहरुबाट मुर्छा पारेर
गहिरो निद्रामा सुताउनु पर्ने हुन्छ
बाँच्नका लागि मानिसले पटक पटक टाल्ने गरेको
घामपानीले खाएर खुइलिएको र मक्किएको शरीर
आधुनिक चिकित्सा विज्ञानको लागि, एक चुनौति
धर्तिमा छोड्नै पर्ने हुन्छ
शायद एक लाश, एक ‘डेड बडी’
जलाउ या गाड, या अध्ययनको लागि
कुनै अँध्यारो कुनामा लगेर थन्क्याउ
मेरो प्रिय साथी
तिम्रो जीवनले, तिमीसँगै हार खाएर
तिमीलाई छोड्ने निर्णय गर्दा, म तिमीसँगै हुनेछु
हाम्रो मित्रताको बन्धन अमर र अटुट छ
तिमी बिर्स, म शान्त सुतिरहेको हुन्छु, तर
तिम्रो जीवनले, जब तिमीलाई धोका दिने निश्चय गर्छ
तिम्रो शरीरले, जब तिमीलाई साथ नदिने संकल्प गर्छ
तिम्रो संसारले, जब तिमीलाई निष्काशन गर्ने योजना गर्छ
मेरो प्रिय साथी, म तिमीसँगै हुनेछु, र
हामी सँगसँगै लामो, अनन्त यात्रामा निस्कने छौं
न दुःख, न पीडा
न घृणा, न द्वेष
न इच्छा, न अभाव
शालिन, शान्त र भावशून्य यात्रा
मेरो प्रिय साथी, हो म तिमीसँगै हुनेछु, र
हामी सँगसँगै लामो, अनन्त यात्रामा निस्कने छौं । त्र