काठमाडौं पिंगलास्थानस्थित सत्यमोहन जोशी स्टुडियो थिएटरमा पुस २९ देखि माघ १५ गतेसम्म नाटक ‘देउराली डाँडी’ मञ्चन हुने भएको छ । रंगकर्मी तथा फिल्मकर्मी अनुप बरालको परिकल्पना तथा निर्देशनमा सञ्चालित एक्टर्स स्टुडियो र नेपाल फिल्म क्याम्पससँगको सहकार्यमा गत जेठ महिनामा मात्र थिएटर सञ्चालनमा आएको हो ।
रंगकर्मी सहलेशको लेखन तथा अमेरिकी रंगकर्मी रोज स्वाइट्जको निर्देशन रहेको नाटकले एउटा गाउँको कथालाई प्रस्तुत गर्छ । नाटकलाई एक्टर्स स्टुडियो र वान वर्ल्ड थिएटरको सहकार्यमा फुल ब्राइट नेपाल यूएसईएफको सहयोगमा प्रस्तुत गर्न लागेको हो ।
वान वर्ल्ड थिएटरले राष्ट्रिय तथा अन्तर्राष्ट्रिय क्षेत्रमा समसामयिक सामाजिक तथा सांस्कृतिक न्यायका मुद्दाहरुहरुमा गुणस्तररिय एवं विविध प्रयोगात्मक शैलीमा नाटक प्रस्तुत गर्दै आएको छ ।
लेखक सहलेशका अनुसार धेरै वर्ष अगाडी फैलिएको महामारीले गर्दा गाउँका सबै पुरुषहरु परदेशिएका हुन्छन् । बाँझो खेत, उजाडिएको देउराली, भत्किदै गएको गाउँको परिवेशमा महिलाहरुले गर्ने संघर्षलाई नाटकमा देख्न सकिन्छ । गाउँमा देखिएको पुराना महामारीको लक्षण, त्यसैमा फेरि संघर्ष, संघर्षको अन्तिम चरणमा महिलाहरुले घाटु नाचको कथा, देवीहरुमा गाउँको पुरानो जीवनशैली खोज्ने साहस र आशाको कथाको सार नै देउराली डाँडी हो ।
नाटकमा रंगमञ्च तथा फिल्ममा समेत सक्रिय रहेका दिया मास्के, पशुपति राई, मेनुका प्रधानका साथै बिनिता थापामगर, रन्जना भट्टराई र सरस्वती चौधरीलगायत महिला कलाकारको भूमिका रहेको छ ।
