प्रसिद्ध नेपाली साहित्यकार भैरव अर्यालको स्मृतिमा स्थापित विभिन्न तीन पुरस्कार भैरव पुरस्कार गुठीले वितरण गरेको छ । अर्यालको ८७ औं जन्मजयन्तीका अवसरमा गुठीले राजधानीमा एक कार्यक्रम गरी पुरस्कार वितरण गरेको हो ।
जसअनुसार २०७९ सालको भैरव पुरस्कार वासुदेव-विद्यादेव लुइँटेल गुठीलाई प्रदान गरिएको छ । यो पुरस्कारको राशि १ लाख ११ हजार १ सय ११ रुपैयाँ रहेको छ । १ लाख १ हजार १ सय ११ रुपैयाँ राशिको भैरव वाङ्मय पुरस्कार साहित्यकार विश्वम्भर चञ्चललाई प्रदान गरियो ।
त्यस्तै ५१ हजार १ सय ११ रुपैयाँ राशिको भैरव प्रतिभा पुरस्कार कलाकार रामचन्द्र अधिकारीलाई प्रदान गरियो । गुठीका अध्यक्ष समेत रहेका वरिष्ठ साहित्यिक पत्रकार रोचक घिमिरेले पुरस्कार हस्तान्तरण गरेका थिए ।
पुरस्कार वितरण कार्यक्रममा भैरव अर्यालको साहित्यिक योगदानबारे साहित्यकारहरू विजय चालिसे, प्राडा सुष्मा आचार्य, गोविन्द घिमिरे, वसन्त रिजाल, गोकर्णेश्वर नगरपालिकाका प्रमुख दीपक रिसाल लगायतले चर्चा गरेका थिए । वासुदेव लुइँटेलको साहित्यिक योगदानबारे डा. मुकेश चालिसेले चर्चा गरेका थिए भने साहित्यकार विश्वम्भर चञ्चलको योगदानबारे डा. ध्रुव घिमिरेले व्याख्या गरेका थिए ।
कार्यक्रममा भैरव अर्यालका कविताहरू एकीकृत गरी प्रकाशित गरिएको कृति ‘भैरव कवितावली’ पनि सार्वजनिक गरिएको थियो । पुरस्कृत स्रष्टाहरूको नाम छनोट गर्न गुठीले साहित्यकार गोविन्दप्रसाद घिमिरे ‘वेदमणि’ को संयोजकत्वमा साहित्यकार प्रल्हाद पोखरेल र व्यङ्ग्यकार नरनाथ लुईंटेलसहितको समिति बनाएको थियो ।
