सहिदको नाममा

सत्ता तन्किएको छ
सहिदको नाममा
गरिबी लम्किएको छ
सहिदको नाममा
सालिक ठडिएको छ
सहिदको नाममा

सहिदको परिवार ठगिएको छ
राज्यको छलछाममा
जीविका चलाउन धौधौ हुँदा
अभाव र उत्पीडनले छुँदा
व्यवस्था मलमपट्टि खोज्दैन
जब चुनाव आउँछ
आउँछ अनि सहिदको सम्झना
जब बजेट आउँछ
आउँछ विषय कमिसनको
यहाँ के भएन
के बाँकी छ र हुन
सहिदको नाममा
जसले आहुति दिए जीवनको
जसले चुनौती थपिदिए परिवारलाई
राज्य बेच्छ मात्र सहिदको नाम
मिलाउँछ फाइल
गर्छ बजेट निकासा
अनि भर्छ पेट कोही कसैले
परिवर्तन बदनाम गर्न
आस्था अपहरण गर्न
पैसाको खेती गरेर
गरेर राहतको नाममा तमासा
उग्ग्राइरहेछन् सीमित मान्छेहरू
न त छोडिन्छ नामलिन सहिदको
न गरिन्छ केही
केवल नाम जपेर
केवल बेचेर लोगो
सहिदको नाममा
मगन्ते बनाएर देशलाई
प्रत्येक दिन
सहिदको नाममा एक मिनेट
गरेर सम्झनाको नाटक मञ्चन
लुटिरहेछ राज्य
लक्ष्य लिएर हिँड्नेहरू
फाटिरहेछन् यात्रामा
हाँसको चाल न
चाल बकुल्लाको बनाएर
राज्यलाई असफल तुल्याउँदै
सहिदको नाम
पटक पटक बेच्नेहरू हो
खबरदार !
सहिद ऋण लिन
धरौटी राख्ने पुर्जा होइन
सहिद त
अलमलिएको देश हिँडाउने
अलपत्र जनता जगाउने
सुनौलो सपनाको
पर्यायवाची हो
सहिदको नाम
उच्चारण गर्नेहरू हो
नगर मोलमोलाइ रगतको
बन्द गर
सहिदको नाममा
माग्ने खेल
किनकि सहिद
होइन भिक्षा पात्र ।

इच्छाकामना ३, चितवन