लेखक निर्दोष जीवनको उपन्यास ‘नोस्टाल्जिया’ शनिबार सार्वजनिक भएको छ । गैंडाकोटमा आयोजना भएको कार्यक्रममा साहित्यकारहरू गोविन्दराज विनोदी, निलम कार्की निहारिका र एलबी क्षेत्री लगायतले उपन्यासको संयुक्त विमोचन गरे ।
निर्दोष जीवनको यो नवौं कृति हो । उनले यसअघि नेपाली गीत संगीतका चारवटा र साहित्यका चारवटा कृति पाठक/स्रोता समक्ष ल्याइसकेका छन् ।
‘नोस्टाल्जिया’मा एक जना संघर्षरत युवाको भोगाइ, पारिवारिक साथ सहयोग र मतान्तर तथा प्रेमका विषयलाई समेटेको निर्दोष जीवनले बताए ।
उपन्यासबारे साहित्यकार निलम कार्की निहारिकाले उपन्यासमा व्यक्तिगत जस्तो लाग्ने भोगाइहरुमा समाजको तस्बिर झल्केको बताइन् । यो उपन्यासको भाषा सरल रहेको उनको टिप्पणी थियो ।
कार्यक्रमका प्रमुख अतिथि कविडाँडा साहित्य समाजका अध्यक्ष एलबी क्षेत्रीले चितवनबाट उपन्यास लेखिने क्रम बढ्न थालेको र निर्दोष जीवनले परिपक्क तरिकाले साहित्यिक कोसेली पस्केको बताए । उपन्यासकारको आफ्नै संघर्ष हो कि जस्तो लागे पनि नोस्टाल्जियाले नेपाली समाजको यथार्थ बोलेको उनले बताए ।
