नेपाली साहित्यकी विशिष्ट नारी स्रष्टा पारिजातको ३१ औं स्मृति दिवसका अवसरमा उनको स्मरण गर्दै उनीसहित तीन सयभन्दा बढी महिला लेखकका पुस्तकहरु प्रदर्शनी शुरु गरिएको छ ।
पारिजात स्मृति केन्द्रको आयोजना र फिनिक्स बुक्सको संयोजनमा आयोजना गरिएको महिला पुस्तक प्रदर्शनी – २०८१ को काठमाण्डौं महानगरपालिका उपप्रमुख सुनिता डङ्गोलले गरेका थिए ।
पारिजात स्मृति केन्द्रका अध्यक्ष मातृका पोखरेलको अध्यक्षतामा भएको उक्त उद्घाटन कार्यक्रममा प्रदर्शनीको औचित्यमाथि केन्द्रका उपाध्यक्ष इन्दिरा दलीले साहित्यकार पारिजातकै संयोजनमा वि.सं. २०४२ साल चैत्र १ गते देखि ७ गतेसम्म सञ्चालन भएको पहिलो महिला पुस्तक प्रदर्शनीको स्मरण गर्दे यस प्रदर्शनीले महिला साहित्यकारहरुमा असल र गुणस्तरीय कृति लेख्ने उत्प्रेरणा जागृत गर्न योगदान पुग्ने विश्वास व्यक्त गरे । ।
प्रदर्शनीमा बालसाहित्यका पुस्तकहरु समेत राखिएका छन् । कार्यक्रममा ‘मैले चिनेको पारिजात’ जस्ता विषयमा पारिजातलाई स्मरण गर्दै साहित्यमा उनले पुर्याएकाे योगदानबारे परिचर्चा गरिएको थियो ।
पहिलो दिनको प्रदर्शनीमा ‘मैले चिनेको पारिजात’ अन्तरसम्बादको ऋङ्खला – १ मा डा. राजेन्द्रप्रसाद अधिकारी र शान्ती कुमारी राई ऋङ्खला – २ मा रघुजी पन्त र इन्दिरा दलीले पारिजातसँग सम्झना र पारिजातको नेपाली साहित्यमा पुऱ्याउनु भएको योगदानको विविध कोणबाट चर्चा र विश्लेषण गरेका थिए ।
पुस्तक प्रदर्शनी २०८१ वैशाख ११ गते देखि १५ गतेसम्म राष्ट्रिय सभागृह, प्रदर्शनीमार्गमा संचालन हुने छ ।
