खेम ओझा ‘बतास’ को नवीनतम कथासंग्रह ‘बुढीपोल्ली’ बजारमा आएको छ। माया पब्लिकेसन प्रालि काठमाडौंले प्रकाशन गरेको सङग्रहमा १२ वटा कथा रहेका छन्। बतासका कथामा मूलतः सुदूरपश्चिमको डोटेली भाषा र संस्कृतिलाई केन्द्रमा राखिएको छ।
वर्षौंदेखि राज्यको आँखामा नपरेको भूगोल, सदियौंदेखि मान्छे भएर बाँच्न नपाएका तर आत्मसम्मानको लडाइँमा होमिएका मान्छेहरुको दैनिकी उक्त कथा संग्रहमा समावेश गरिएको लेखक ओझाले बताए।
जातीय विभेद, लैंगिक असमानता र कुरीतिको विरुद्धमा लेख्ने बतासले बुढीपोल्लीमा कर्नाली तर्न नसक्ने तर महाकाली तर्न सक्नेहरूको जीवन गाथालाई शब्दका माध्यमले उन्ने प्रयास गरेका छन्। डोटेली मौलिक संस्कृतिलाई विसंरचना गर्ने प्रयास गरिएको लेखक ओझाले बताए।
उक्त कथासंग्रहमा मान्छे हराएको सूचना, हाफ चश्मा, हटस्पट, नोकिया एक्स वन, रम्मी, सराबी कान्छो, आदतको दास, बदनाम गल्लीको कथा, कथालय नकटो, बुढिपोल्ली, छोइडुम र ओल्के लगाएका कथा रहेका छन्। २०५ पेज रहेको उक्त कथासंग्रह हाल १ हजार १ सय प्रति छापिएको छ। धनगढीको समर्पण पुस्तक पसलमा उक्त कथा संग्रह राखिएको छ।
कैलालीको गोदावरी नगरपालिका- ७ लालपुर निवासी ओझाले पहिलो पटक एकल कथासंग्रहका रूपमा बुढीपोल्ली बजारमा ल्याएका हुन्। यसअघि उनले संयुक्त रूपमा बजारमा आएको कथासंग्रह छकालैमा पनि कथाहरु लेखेका थिए। उक्त कथासंग्रहमा देशभरीका २० जना कथाकारहरूका कथा समावेश गरिएका थिए।
उक्त कथासंग्रहको राम्रो प्रतिक्रिया पाइएपछि आफैंले एकल रूपमा कथासंग्रह बजारमा ल्याएको ओझाले बताए। त्यसबाहेक ओझाले यसअघि गजल संग्रह बतास बजारमा ल्याइसकेका छन्।
