कवि विनोदविक्रम केसी शनिबार ‘कविता जमघट’ मार्फत झापामा गुन्जिए । रिडर्स झापाको निम्तोमा काठमाडौं खाल्डो नाघेर सीमान्त सहर ओर्लिएका विनोदविक्रमले नयाँ पुराना सिर्जना पस्किएर फ्यानहरुलाई मन्त्रमुग्ध पारे ।
दर्शकमाझ उनले ‘चुनावमा’ शीर्षकबाट कविताको स्वाद पस्किए, ‘गोल्ड मेडल’ मा बिट मारे । केसीले ‘अश्लील’, ‘मृतक प्रेमीको फिराद’, ‘गोल्ड मेडल’, ‘तपाईं सीसीटीभीको निगरानीमा हुनुहुन्छ’, ‘खादा ओडाएर स्वागत गरिरहेका महिलाहरू’, ‘भैंसी र आमा’, ‘ज्यास्मिन म्यामको एक हप्ते कार्यकाल’ जस्ता चर्चित कवितामार्फत भुईंमान्छे र सीमान्तकृतको आवाज मात्रै बोलेनन्, जात व्यवस्था र नेपाली संसदीय राजनीतिका बेथितिमाथि तीखो व्यंग्य प्रहार गरे ।
करिब डेढ घण्टा मञ्चमा उभिएरै प्रस्तुति दिएका उनलाई दामोदर ढुंगेल, संजु साम्पाङ, संस्कृति रिजाल, सौरभ मैनाली र संगीत श्रोताले बेला–बेला रचना वाचनमा सघाए । रिडर्स झापाका अध्यक्ष सैलेश दाहालले केसी विद्रोही चेत भएका बागी कवि भएको भन्दै थपे,‘केसीले समाज रुपान्तरणका लागि कवितालाई हतियार बनाएका छन् । उनी कवितामार्फत राजनीति गर्छन् ।’
