अक्षरमार्गले आफ्नो एघारौँ वार्षिक उत्सवको अवसरमा सात जना स्रष्टाहरुलाई सम्मान गरेको छ । विष्णुहेम अक्षरमार्ग वरिष्ठ साधक सम्मानबाट वरिष्ठ कलाकार केके कर्माचार्य, श्रीराम स्मृति अक्षरमार्ग स्रष्टा सम्मानबाट सनत रेग्मी, नरबहादुर अक्षरमार्ग स्रष्टा सम्मानबाट साहित्यकार गायत्री श्रेष्ठ, कृष्णसुन अक्षरमार्ग साहित्यिक पत्रकार सम्मानबाट वरिष्ठ साहित्यिक पत्रकार नगेन्द्रराज शर्मा, कृष्णदास अक्षरमार्ग स्रष्टा सम्मानबाट श्रीकृष्ण महर्जन, अक्षरमार्ग भरतराज काभ्रेली स्रष्टा सम्मानबाट डा. गोपाल पौड्याल सम्मानित भएका हुन् ।
उहाँहरूलाई कार्यक्रमका विशिष्ट अतिथि साहित्यकार मोहन दुवाल र साहित्यकार श्रीओम श्रेष्ठ रोदनले सम्मानपत्र, मायाको चिनो, माला, दोसल्ला, टीका र नगदसहित सम्मान समर्पण गर्नुभएको थियो । सम्मान गर्ने क्रममा उहाँहरूलाई ध्रुबकृष्ण ताम्राकार, प्रल्हाद केसी, उत्तम महत लगायतले सघाएका थिए ।
नेपाली भाषा र साहित्यको श्रीबृद्धिमा समर्पित अक्षरमार्गद्धारा आयोजित सो कार्यक्रममा विशिष्ट अतिथि तथा अतिथिहरूले नेपाली साहित्यको उन्नयनका लागि अक्षरमार्गले खेलेको भूमिका उल्लेखनीय रहेको विचार व्यक्त गरे । साहित्यिक पत्रिका प्रकाशित गर्नु राष्ट्र«का स्रष्टाहरुलाई सम्मान गर्नु र समाजमा चेतना फैलाउने कार्य आफैमा महान कर्म हो, यो कुनै उद्योग वा व्यापार नभई राष्ट्र सेवा हो भन्ने विचार मन्तव्यका क्रममा स्रष्टाहरूले पोखे ।
सो कार्यक्रममा साहित्यकार मोहन दुवाल, श्रीओम श्रेष्ठ रोदन, पनौती नगर पालिककाका प्रमुख रामशरण भण्डारी, केके कर्माचार्य, गायत्री श्रेष्ठ, साहित्यिक पत्रकार नगेन्द्रराज शर्मा, श्रीकृष्ण महर्जन, डा. गोपाल पौड्याल, पवन आलोक मीना चौलागाइँ, विजयराम कर्माचार्य, ध्रुबकृष्ण ताम्राकार लगायतले मन्तव्य व्यक्त गरेका थिए ।
सोही समारोहमा साहित्यकारसूर्यप्रसाद लाकोजूद्धारा लिखित सिर्जना लेखन कला र अक्षरका स्वरुपहरू नामक मुक्तकसङ्ग्रह पनि लोकार्पण गरिएको थियो ।
