‘रमेश विकल वाङ्मय पुरस्कार’ यो वर्ष प्रा. डा. वासुदेव त्रिपाठीलाई प्रदान गरिएको छ । शनिबार आरुबारीमा १५औँ विकल स्मृतिसभाको अवसर पारेर रमेश विकल साहित्य प्रतिष्ठानले त्रिपाठीलाई पुरस्कृत गरेको हो । पुरस्कारका साथ ५० हजार रुपैयाँ प्रदान गरियो ।
‘रमेश विकल–सुशीला समाजसेवा पुरस्कार’ परोपकार संस्था, काठमाडौंलाई प्रदान गरियो । यो पुरस्कारका साथ २० हजार रुपैयाँ प्रदान गरिएको प्रतिष्ठानले जनाएको छ ।
‘रमेश विकल सिर्जना पुरस्कार’ साहित्यकार माधव काफ्ले (रौतहट)लाई प्रदान गरियो । ‘रमेश विकल बालसाहित्य पुरस्कार’ रामबाबु सुवेदी (कास्की)लाई प्रदान गरियो ।
‘रमेश विकल–सुशीला संघर्र्षशील नारी पुरस्कार’ सत्यदेवी खड्का (दैलेख)लाई र ‘रमेश विकल कला–संगीत पुरस्कार’ हास्यकलाकार सुभास गजुरेललाई प्रदान गरियो । उनीहरूलाई पुरस्कारका साथ जनही १० हजार रुपैयाँ प्रदान गरिएको थियो ।
कार्यक्रममा प्रतिष्ठानका उपाध्यक्ष केके कर्माचार्य, सर्वोच्च अदालतका न्यायाधीश डा. मनोजकुमार शर्मा, सांसद सन्तोष चालिसे, गोकर्णेश्वर नगरपालिकाका मेयर दीपक रिसाल, प्रा. डा. हेमनाथ पौडेल, प्रा. डा. वासुदेव त्रिपाठी, गोविन्दप्रसाद घिमिरे ‘वेदमणि’, विजय चालिसेलगायत व्यक्तिले रमेश विकल र संस्थाका बारेमा बोलेका थिए ।
शनिबार नै सम्पन्न प्रतिष्ठानको १७औँ साधारणसभाबाट साहित्यिक पत्रकार रोचक घिमिरेको अध्यक्षतामा नयाँ कार्यसमिति निर्विरोध चयन गरिएको छ । कार्यसमितिको उपाध्यक्षद्वयमा केके कर्माचार्य र प्रा. डा. हेमनाथ पौडेल, महासचिवमा विजय चालिसे, सचिवमा वसन्त रिजाल र कोषाध्यक्षमा शाम्बकुमार चालिसेलाई चयन गरिएको छ ।
कार्यसमितिका सदस्यहरूमा महेन्द्र चालिसे, मुना रुपाखेती, मातृका पोखरेल, रामप्रसाद पौडेल र आलोक चालिसे रहेका प्रतिष्ठानले जनाएको छ ।
