दीपा राईको गैंडाकोटको नारायणी रिसोर्टमा एकल कविता वाचन कार्यक्रम सम्पन्न भयो । कार्यक्रमको पहिलो चरणमा मातृमन्त्र, खुसी, समय रुख र म, त्रासद र पौरुष गरी ६ वटा कविता सुनाउनुभयो । कविले कविता वाचनका क्रममा रचनागर्भ पनि सुनाउनुभयो । पहिलो चरणका कविता उहाँले `दियोको अन्तिम लप्का र शरद्का पहेँला पातहरू´ कवितासङ्ग्रहबाट प्रस्तुत गर्नुभएको थियो ।
कार्यक्रममा जगदीश बराल र भूपिनले कवि राईको व्यक्तित्वका बारेमा चर्चा गर्नुभएको थियो । कवि राई प्रकृतिलाई बेस्सरी माया गर्ने र विशेषगरी फूलहरूसँग खेल्न रुचाउने स्वभावकी भएको कवि भूपिनले बताउनुभयो । कार्यक्रममा राईको कृतिमाथि रञ्जना लिम्बुले टिप्पणी गर्नुभएको थियो ।
कवि फूलजस्तै शान्त स्वभावकी भए पनि कवितामार्फत विद्रोहका आवाजलाई उठान गरेको रञ्जनाले बताउनुभयो । अर्का वक्ता उदय अधिकारीले कविताका बेनामे फूलहरूमा कविको अस्तित्व देखिएको बताउनुभयो । अक्षर समूह चितवनले आयोजना गरेको कार्यक्रम रमेश प्रभातको अध्यक्षतामा सम्पन्न भएको थियो ।
