नेपाली कला साहित्य डट कम प्रतिष्ठानकाे आयोजना र पाल्पा साहित्य समाजको सह आयाेजनामा पाल्पामा कार्यक्रम सम्पन्न भयो । कार्यक्रमको प्रमुख अतिथिका रूपमा संस्कृतिविद् तथा वरिष्ठ कवि तुलसी दिवस हुनुहुन्थ्यो भने विशिष्ट अतिथिका रूपमा साहित्यकार सरुभक्त, अशेष मल्ल, डा. विमल कोइराला, सावित्री मल्ल कक्षपती, व्यङ्ग्य कवि लक्ष्मण गाम्नागे, हरिप्रसाद मानसाग्निको साथमा र काठमाडौवाट राजेश्वर कार्की, मोमिला जोशी,महेश पौडेल,सुन्दर बस्नेत, सिर्जना दुवाल,जयदेव भटराई,विमल वैद्य, असीम सागर,डा. कृष्णराज डिसी,ईश्वरी सिलवाल पाण्डेको अतिथीको रुपमा उपस्थिति थियो । सम्मानित व्यक्तित्वका रूपमा पाल्पाली स्रष्टाहरू पुष्कर अथक रेग्मी र राजेन्द्रगाेपाल सिंह आमन्त्रित थिए । आमन्त्रित अतिथि तथा सहभागीहरूलाई स्वागत गर्ने काम पाल्पा साहित्य समाजका सल्लाहकार चित्रवलि राम सुवालले गरे । सञ्चालनको भूमिकामा रहेका साहित्यकार महेश पाैड्यालले नेपाली कला साहित्य डट कम प्रतिष्ठानकाे परिचय र उद्देश र अभियानमाथि प्रकाश पारे । सोही क्रममा फोटो सङ्कलक सुन्दर बस्नेतद्वारा फोटो कविता प्रदर्शन गरिएको थियो ।
यसपछि स्रष्टा पुष्कर अथक रेग्मीलाई योगेश्वर वाङ्मय पुरस्कार तथा राजेन्द्र गाेपाल सिंहलाई ग्रेगरी कला साहित्य पुरस्कारबाट सम्मान पत्र तथा नगदसहित सम्मान अर्पण गर्ने काम भयो । पुरस्कृत व्यक्तिको व्यक्तित्व र कृतित्व माथि प्रकाश पार्ने काम प्रा डा सावित्री मल्ल कक्षपतीले गरिन् । साहित्यकार सरुभक्त श्रेष्ठले प्रतिष्ठानले विगत पन्ध्र वर्षदेखि राष्ट्रका विभिन्न ठाउँका साथै अन्तर्राष्ट्रिय क्षेत्रमा साहित्यको प्रचारप्रसार र श्रीवृद्धिमा खेलेको भूमिकाको प्रशंसा गरे ।
यससँगै साहित्यकार पुष्कर अथक रेग्मी र सांस्कृतिक अभियन्ता राजेन्द्र गाेपाल सिंहद्वारा लिखित पाल्पाको साहित्यिक इतिहास नामक कृतिको विमोचन गर्ने काम प्रमुख अतिथि र विशिष्ट अतिथिद्वारा संयुक्त रूपमा सम्पन्न भयो । विमोचित कृत्तिमाथिको समीक्षात्मक टिप्पणी गर्ने काम समालोचक दीपक बस्यालले गरे । कृत्तिको सबल पक्ष र दुर्बल पक्षलाई झल्काउने काम पनि गरे उनले । नाटककार अशेष मल्लले यस्ता महत्त्वपूर्ण कार्यक्रममा राज्यका जिम्मेवार व्यक्तिहरूलाई पनि उपस्थित गराउनु सान्दर्भिक हुने विचारका साथमा हामीले अब हाम्रो प्रकृति बेच्ने बेला आएको सन्दर्भ उल्लेख गरे ।
कार्यक्रमको अर्को चरणमा सिर्जना उत्सव रहेको थियो । सो क्रममा काठमाडौँबाट आएका र पाल्पाका स्रष्टाहरूद्वारा रचना वाचन गर्ने काम भयो ।
कार्यक्रममा कवि विमल कोइरालाले सरकारले गर्न नसकेको काम नेपाली कला साहित्य डट कम प्रतिष्ठानले गर्दै आएको विचार प्रस्तुत गरे । प्रमुख अतिथि तुलसी दिवसले सीमित साधन र स्रोतमा देशभित्र तथा बाहिर साहित्यको उन्नयनमा लागेको प्रतिष्ठान वास्तवमै प्रशंसा गर्न लायक रहेको विचार प्रस्तुत गरे । मानिसमा निहित सृजनशील प्रतिभालाई प्रस्फुटन गराउन उत्प्रेरकको काम गर्ने संस्था सधैँ धन्य रहने धारणा उनको थियो ।
सभाध्यक्षका रूपमा रहेकी साहित्यकार माेमिला जोशीले भित्रैबाट हुटहुटी जागेर संस्थाका माध्यमबाट भाषा साहित्यकाे सेवामा लागेको विचार प्रस्तुत गरिन् । लासमाथि आँसु चुहानु भन्दा प्रतिभालाई जीवनकालमै सम्मान गर्नुपर्ने कुरामा उनले जोड दिइन् ।
