जब सङ्कट पर्छ दुर्गा बन भन्छौ
जब पार्नुपर्छ सुनको अन्डा
तब जादुमयी मुर्गा बन भन्छौ
जब पहाड आउँछ, बारुद बनेर फोड भन्छौ
जब मृत्यू नजिक आउँछ छ, सावित्री बनेर हात जोड भन्छौ
जब फोर्नु पर्छ खेतका डल्ला
तब भीमसेन जस्तै बन भन्छौ
कसरी भरूँ फूलजस्तो शरीरमा भीमको तागत म ?
रातमा राग जगाउदा रतिझैँ बन भन्छौ
झिसमिसे हुन नपाउदै फेरि सतीझैँ बन भन्छौ
घरि सबै सहेर बग्ने पबित्र गङ्गा बन भन्छौ
तिम्रो मन बहलाउनु पर्दा फेरि चङ्गा बन भन्छौ ।
पानी बन भन्छौ तिमिलाइ रिस उठ्दा
आगो बन भन्छौ तिमीलाई चिसो हुँदा
तिमी राम भन्दा हनुमान् बन भन्छौ
तिमी मान्छे बन्दा भगवान् बन भन्छौ
जब चपाउनु पर्छ गरिबीका चिउरा
फलाम बन भन्छौ
जब चोट लाग्छ तिमीलाइ
मलम बन भन्छौ ।
कसरी फेरूँ म हरदम स्वरूप ?
बारुलाको जस्तो छिनेको कम्मर मन पर्छ रे तिमीलाइ
मृगका जस्ता नयनले हेर्नूपर्यो रे तिमीलाइ
नागको जस्तो लचक पनि आउनुपर्यो रे कम्मरमा
कोमल गुलाबहरु फुल्नुपर्यो रे अधरमा
नवजात छाउरालाइ डकार्ने बनाउन पर्दा
लैनी भैँसीझैँ बनिदिनु पर्ने
जब हुर्कन्छन थोरै,छाउराहरु
तिम्रा लागि फेरि दीपिका बनिदिनु पर्ने ।
बारुलाको शरीरमा गुलाब कसरी फुलाउँ म?
किन स्विकार्न सक्तैनौ तिमी
गुलाबको बोटमा दुइचार काँडाहरु?
किन पचाउदैनौ कमलको पातमा
हिलाका केही बाछिटाहरु?
किन सहन सक्दैनौ
सीताका सारीमा खोटका केही धब्बाहरु?
किन स्विकारदैनौ
बिषकन्याको शरीरबाट निस्कने मन्द बिष?
किन स्विकार्दैनौ
मत्स्यगन्धामा नजानिँदो नमिठो गन्ध?
नबिर्से हुने चन्द्रमामा पनि दाग हुन्छ ।
तिम्रै खातिर,
जब पानी बनेर तरल बनेँ
यसरी पोखिन कहाँ हुन्छ भन्यौ
जब आगो बनेर बल्न खोजेँ
यसरी दन्कन कहाँ हुन्छ भन्यौ
जब श्रृङगारिएर अप्सरा बनेँ
यसरी मस्कन कहाँ हुन्छ भन्यौ
लौ त भनेर फेरि अरट्ठ जीउ लिएर आएँ
तब मलाइ अलच्छिना भन्यौ ।
आगोमा नौनी कसरी जोगाउँ म?
जब भोलेनाथ बनेर बौलाउँछौ
पार्वती बनेर नाँच भन्छौ
जब कृष्ण बनेर बजाउँछौ मुरली
राधा बनेर कम्मर भाँच भन्छौ
जब इन्द्र बनेर उत्ताउलिन्छौ
सची बनेर हाँस बन्छौ
कुन अवतार लिऊँ?
कामदेवकी रति
या महादेवकी सती
इन्द्रकी उर्वशी
या सूर्यकी शशी?
