राष्ट्रिय गानका रचनाकार व्याकुल माइला (प्रदीपकुमार राई) ले आफ्नो नाममा गठित प्रतिष्ठानलाई आफ्नो घरजग्गा हस्तान्तरण गरेका छन् । मानेभन्ज्याङ–६ मा रहेको १४ आना घरघडेरी उनले व्याकुल माइला प्रतिष्ठान नेपाललाई स्वामित्व हस्तान्तरण गरेका हुन् ।
‘पछि प्राचीन स्मारक बनाउने गरी घर संरक्षणसमेत गर्ने सर्तमा दान गरेको हुँ,’ उनले भने । उनको घर पिता मानबहादुर राईले २०४० मा बनाएका थिए । घरमा बुइँगलसमेत गरी ६ कोठा छन् । घरको छानो ढुंगाको छ । प्रदेश १ सरकार, भौतिक पूर्वाधार मन्त्रालयले आर्थिक वर्ष २०७८/८९ मा व्याकुल माइला प्रतिष्ठानको भवन निर्माण गर्न १२ लाख रुपैयाँ बजेट छुट्याएको छ । यो बजेटले घर प्रबलीकरण हुँदै छ ।
मानेभन्ज्याङ–६ का अध्यक्ष हेमराज राईको संयोजनमा अनुगमन समिति गठन भएको छ । घरको प्रबलीकरणका लागि एक करोड रुपैयाँको इस्टिमेट बनाएको सहरी विकास कार्यालयले जनाएको छ । प्रतिष्ठानले सर्जक माइलाको सम्पूर्ण इतिहासलाई जीवित राख्न अहिलेदेखि संरक्षणको काम थाल्ने उद्देश्य लिएको छ ।
