आकाशमुखी बजारमा

लेखक, पत्रकार एवम् अनुवादक मोहन मैनालीद्वारा अनूदित पुस्तक ‘आकाशमुखी’ लोकार्पण भएको छ ।
आज काठमाडौँमा आयोजित समारोहमा अध्येताद्वय हरि शर्मा र सगुना शाहका साथमा मोहन मैनालीले पुस्तकको लोकार्पण गरेका हुन् ।
पुस्तकको टिप्पणी गर्दै हरि शर्माले भने, “मोहनजीद्वारा छनौट भएका निबन्ध र तिनको अनुवाद, अनुवाद लाग्दैन; लाग्छ यो मौलिक पुस्तक हो । पुस्तकमा छानिएका निबन्धले पश्चिमा समाजको जीवन र समाज परिवर्तन कथा बुनिरहँदा तिनले हामीलाई सफलताका निम्ति अनन्त यात्राको प्रेरणा दिन्छन् । यो नै आकाशमुखीको सफलता हो ।” साथै शर्माले यो पुस्तक आफ्ना सन्तानलाई पढ्न सबैले सिफारिस गर्नु पर्ने बताउँदै उनले भने, “म चाहन्छु, यस्तो किताब त विद्यालयको कोर्समा होस् ।”

कार्यक्रममा पुस्तकमाथि टिप्पणी राख्नेक्रममा सगुना शाहले भनिन्, “नारी शिक्षा, समानता, स्वतन्त्रताका लागि पश्चिमा समाजले कसरी संघर्ष गरेको थियो र हाम्रो समाजको सबै वर्गको चेतनाका निम्ति यो पुस्तक प्रेरक हुन सक्छ |” मन्तव्यको क्रममै उनले भनिन्, “के हामी आजको समयमा आइपुग्दा पनि आकाशमुखी हुन सकेका छौँ त ?”

वक्ताद्व्यले पुस्तक नेपाली साहित्यका निम्ति उम्दा खुराक रहेको बताए ।
पुस्तकका निबन्ध छनौट र अनुवादबारे मोहन मैनालीले आफ्ना विचार राखेका थिए । उनले भने, “जब अफ्ठेरो परिस्थितिमा कुनै काम गरिन्छ, त्यसको नजिता पक्कै पनि विश्वसनीय हुन्छ ! यो कोरोनाकालको सन्तान हो ।”