नेपाल प्रज्ञा प्रतिष्ठानले आयोजना गरेको राष्ट्रिय कविता महोत्सव-२०७८ मा भोजपुरकी कविता राईको ‘देशको नक्सा’ कविता प्रथम भयो।
त्यसैगरी, धादिङकी अमृता स्मृतिको ‘डढेलोपछि पनि वसन्त आउँछ’ कविता दोस्रो भएको छ। बर्दियाकी निरञ्जनाकुमारी चन्दको ‘युगीन प्रतिध्वनि’, ताप्लेजुङकी सविता बरालको ‘आमा म आएँ अब’ कविताले तेस्रो स्थान हासिल गरेको छ। नुवाकोटका प्रकाश सिलवालको ‘बोधिसत्वको खोप’ कविताले पनि तेस्रो स्थान पायो।
प्रज्ञाले पहिलो हुनेलाई ५० हजार, दोस्रो हुनेलाई ४० हजार र तेस्रो हुनेलाई ३०– ३० हजार र सम्मानपत्रले पुरस्कृत तथा सम्मानित गर्नेछ।
कार्यक्रमको प्रतिष्ठानका कूलपति गङ्गाप्रसाद उप्रेतीले उद्घाटन गर्दै भने, ‘कविता महोत्सवको दिन नेपालको वाङ्मय क्षेत्रको विशिष्ट दिन भएको र यो महाकवि लक्ष्मीप्रसाद देवकोटाका परिकल्पनामा युगकवि सिद्धिचरण श्रेष्ठका थालनी भएको हो ।’
प्रतिष्ठानका प्राज्ञसभा सदस्य तथा संञ्चार संयोजक शशी लुमुम्बुले महोत्सवमा ७ सय ६४ जनाले सहभागिता जनाएकामा अन्तिम प्रतियोगिताका लागि ४१ कविता छनोट गरिएको र स्वदेश बाहिर रहेका आठ र देशका २० जिल्लाबाट प्रतियोगितामा सहभागिता जनाइएको जानकारी गराएका थिए।
