जनमत वाङ्मय प्रतिष्ठानका अध्यक्ष, जनमत साहित्यिक मासिक का प्रधान सम्पादक तथा नेपाल साहित्यिक पत्रकार संघका केन्द्रीय अध्यक्ष वरिष्ठ साहित्यकार मोहन दुवालको अध्यक्षता एवम् जनमत साहित्य बाटिकाको आयोजनामा महिला कविगोष्ठी तथा सम्मान कार्यक्रम आइ ओपनर्सको कार्यालय, चाकुपाट, ललितपुरमा भव्यतापूर्वक सम्पन्न भयो।
अध्यक्ष मोहन दुवालले ‘हामी निरीह प्राणीका हत्यारा हौँ’ शीर्षकको व्यङ्ग्यात्मक कविता वाचन गर्दै नेपाली भाषा र साहित्यलाई राज्यले अनुत्पादक ठान्ने प्रवृत्तिले साहित्यिक सर्जकहरूमा अन्याय भइरहेको बताउनुभयो। उहाँले निम्न-मध्यम वर्गका जनता, गरीब र दुःखीहरूमाथि भइरहेको अन्यायको चित्रण गर्दै देशमा बढ्दो भ्रष्टाचार र अराजकताले सीमा नाघेको उल्लेख गर्नुभयो। साथै, यस्तो अवस्थाले सिर्जनशील समाजमा मौन बस्नु अपराध सरह हुने विचार व्यक्त गर्नुभयो।
कार्यक्रमका प्रमुख अतिथि, नेपाली कला साहित्य डटकम की अध्यक्ष तथा चर्चित कवि मोमिला जोशीलाई अध्यक्ष मोहन दुवालले सम्मान गर्नुभएको थियो। २०८१ सालमा आयोजित जनमतको ४१औँ वार्षिकोत्सवमा सम्मानित व्यक्तित्वका रूपमा घोषित मोमिलालाई सोही सम्मान समर्पण गर्न यो पुरक कार्यक्रम आयोजना गरिएको हो। सम्मान ग्रहण गर्दै कवि जोशीले साहित्यमा सामाजिक अनुमोदन प्राप्त गर्नु ठूलो गौरवको विषय भएको बताउँदै, स्रष्टा–द्रष्टा मोहन दुवाललाई “नेपालले अझै नचिनेको हिरा” को रूपमा व्याख्या गर्नुभयो। उहाँले ‘भीमसेनको सुसाइड नोट’ शीर्षकको कविता वाचन गर्नुभयो।
विशेष अतिथि तथा चर्चित साहित्यकार उषा शेरचनले समाजमा महिलाले भोग्नुपरेका पीडा र अन्यायविरुद्ध जागरणको शङ्खघोषसहित नयाँ चेतना र विद्रोहको खोजीलाई प्रस्तुत गर्ने कविता वाचन गर्नुभयो।
त्यसैगरी, नेपाल प्रज्ञा–प्रतिष्ठानका प्राज्ञसभा सदस्य तथा नेपाल साहित्यिक पत्रकार संघका केन्द्रीय महासचिव चेतनाथ धमलाले गोष्ठीमा वाचन गरिएका १४ वटा कवितामाथि समीक्षात्मक टिप्पणी प्रस्तुत गर्नुभयो। उहाँका अनुसार प्रस्तुत कविताहरूले देशको वर्तमान अवस्था, कुशासन, विकृति, विसङ्गति, अराजकता, अन्याय र हिंसाविरुद्धको सामूहिक प्रतिवादलाई प्रतिबिम्बित गरेका छन्। साथै, ‘आमा’ शीर्षकका कविताहरूले मातृत्व, स्नेह, र महिलामाथिको पारिवारिक तथा सामाजिक हिंसाको भावनात्मक चित्रण गरेको बताउँदै, अबका कवितालाई कृत्रिम बौद्धिकताको प्रभावबाट जोगाउन चुनौतीपूर्ण हुने टिप्पणी गर्नुभयो।
कार्यक्रममा जनमत साहित्य डटकम की सम्पादक तथा कवि सिर्जना दुवालले स्वागत मन्तव्यसहित ‘आत्मीय गठबन्धन’ शीर्षकको कविता वाचन गर्नुभयो।
महिला कविगोष्ठीमा प्रा.डा. सविना श्रेष्ठ, डा. सावित्री श्रेष्ठ, कमला कायस्थ, तारा केसी, पूर्णदेवी न्यौपाने, राधादेवी राजवंशी, सविता श्रेष्ठ ‘बेहोसी’, शारदा घिमिरे भैल, धनकुमारी न्यौपाने र मोतीशोभा श्रेष्ठले आ–आफ्ना कविता वाचन गर्नुभएको थियो।
कार्यक्रममा जनमत की सम्पादिका भारती श्रेष्ठ, पत्रकार भगवती तिमल्सिना लगायत साहित्य, पत्रकारिता र समाजसेवामा संलग्न व्यक्तिहरूको उल्लेखनीय उपस्थिति थियो।
कार्यक्रमको सञ्चालन मानवअधिकारकर्मी राजु सरकारले गर्नुभएको थियो।
नेपाली भाषा, साहित्य र संस्कृतिको उन्नतिका लागि निरन्तर कार्यरत जनमत वाङ्मय प्रतिष्ठानले ४२ वर्षदेखि विशिष्ट योगदान पुर्याउँदै आएको छ। स्रष्टा उत्पादनशालाका रूपमा पहिचान बनाइसकेको जनमतले देश–विदेशमा पनि सशक्त उपस्थिति कायम गरेको छ।
