नेपाली नाटक ‘क्लेशाः’ भारतको अन्तर्राष्ट्रिय नाटक महोत्सवमा मञ्चन भएको छ। प्रतीक्षा कट्टेलको लेखन र विजया कार्कीको परिकल्पना तथा निर्देशन रहेको नाटक ‘क्लेशाः’को २५ औँ भारत रङ्ग महोत्सवमा मञ्चन भएको हो।
भारतको राष्ट्रिय नाट्य विद्यालयले आयोजना गर्ने महोत्सवमा नाटक ‘क्लेशाः’ नयाँ दिल्लीमा र उत्तराखण्ड रामनगर (नैनीताल)मा गरी दुई मञ्चन भएको हो। नाटक नयाँ दिल्लीको एलटिजी अडोटोरियममा फेब्रुअरी १७ र रामनगरको नारायण दत्त अडोटोरियममा फेब्रुअरी १९ मा मञ्चन भएको हो।
क्लेशाः का पाँच तत्वहरु अज्ञानता, अहङ्कार, मोह, विच्छेद र डरको दार्शनिक पृष्ठभूमिसहित नेपालको एक दुर्गम गाउँमा पञ्चायती व्यवस्थाको सामाजिक र सांस्कृतिक परिवेश नाटकमा छ। हरेक मञ्चनपछि ‘डाइरेक्टर मिट’ सेसनमा नाटकबारे अन्तरक्रिया समेत भएको थियो। सो क्रममा निर्देशक विजया कार्कीले रामायणका पात्रहरूलाई फरक कोणबाट विश्लेषण र अवलोकन नाटकमा गर्ने प्रयास गरिएको बताए। उनले भने, “रामायण मेरा लागि एक कथा हो, त्यसबाट प्रभावित भएर पात्रहरूबिचको मानसिक तथा भौतिक द्वन्द्वको कथा भनेको हुँ। यो समाजको वर्गबिचको, पुरुष महिलाबिचको, एकै पात्रभित्रको अन्तर्द्वन्द्वको पनि कथा हो।”
करमन कला समूहको प्रस्तुति रहेको नाटकमा सरिता गिरी, सुरक्षा पन्त, कुशल पाण्डे, सुदीप खतिवडा, विजय बराल, विकास जोशी, रोशनी कार्की, स्वप्निल घिमिरे, सन्दीप श्रेष्ठ, संयोग गुरागाईँ, मिलन कार्की, सुजन खतिवडा, सविना थापा र सरस्वती अधिकारीको अभिनय रहेको थियो। कलाकार सुरक्षा पन्तले नाटक ‘क्लेशाः’बाट थिएटर डेब्यु गरेकी हुन्। त्यस्तै नाटकको महोत्सव टिममा निर्देशक कार्कीसँगै विभिन्न प्राविधिक भूमिकासहित रिजन परियार, उमेश तामाङ, अनुप न्यौपाने, रूपक खरेल, रुजा राउत र केदार श्रेष्ठ छन्।
यस नाटक २०७६ सालमा नियमित तीन साता र यस वर्ष भारत रङ्ग महोत्सवमा आउनुअघि नेपालको मण्डला थिएटरमा तीन विशेष मञ्चन भएको थियो।
