साहित्यकार सरुभक्तको मुक्तक सङ्ग्रह ‘सरुभक्तका मुक्तक’को आइतबार पोखरामा लोकार्पण गरिएको छ । सरुभक्तका तीन मुक्तक कृति प्रकाशित छन्, दुई अप्रकाशित । प्रकाशन भएर पनि बजारमा अप्राप्य भइसकेका पुराना कृति र अप्रकाशित कृतिका सबै मुक्तक एउटै पुस्तकमा बजारमा आएका छन् ।
नेपाल मुक्तक प्रतिष्ठान, बेलायत शाखाद्वारा प्रकाशित उक्त कृतिको आइतबार पोखरामा प्रतिष्ठान र मुक्तक मञ्च केन्द्रीय समितिले आयोजना गरेको समारोहमा अग्रज कलाकार वात्स्यायन, मुक्तककार सरुभक्त, नेपाली लेखक संघका अध्यक्ष तीर्थ श्रेष्ठ लगायतले कृति सार्वजनिक गर्नुभएको हो । मुक्तक बिक्रीबाट जम्मा भएको रकमबाट अक्षयकोष खडा गरी मुक्तकको उन्नयनमा खर्च गरिने प्रतिष्ठानका सल्लाहकार डा रुपक श्रेष्ठले जानकारी दिनुभयो ।
कलाकार वात्स्यायनले मुक्तकको गहनता र यसमा जीवन, दर्शनको प्रयोग सरुभक्तको समर्पणको परिणाम भएको विचार राख्नुभयो । मुक्तककार सुरुभक्तले ०३५ सालमा प्रकाशित आफ्नो पहिलो कृति ‘बन्द खामभित्र’देखि पछिल्लो क्रमका मुक्तकमा समय र आफूले देखेको जीवन, जगतलाई चित्रण गर्ने कोशिष गरेको उल्लेख गर्नुभयो ।
“मैले बाँचेको समय र परिवेश चित्रण गर्न खोजेको छु । नयाँ जिज्ञाशु पुस्ता, अनुसन्धाता र मुक्तकप्रेमीहरुलाई सहज होस् भनी एकै पुस्तकमा सबै मुक्तक प्रकाशन गरिएको हो ।”
नेपाली लेखक संघका केन्द्रीय अध्यक्ष तीर्थ श्रेष्ठले मुक्तकमा युवावस्थाको प्रेम र सामान्य जीवनका पक्ष समेट्ने युगमा सरुभक्तले जीवन र जगतका गम्भीर पक्ष यसमा समेटेको उल्लेख गर्नुभयो । “मुक्तक रुख होइन, जरा होइन, हाँगा पनि होइन, बिज हो । जुनमा सिङ्गो रुख बन्ने सामथ्र्य निहित हुन्छ । नेपाली मुक्तकमा जीवन, दर्शनका गहन पक्ष समावेश गर्ने श्रेय सरुभक्तलाई जान्छ,” उहाँ भन्नुहुन्छ ।
नेपाल संगित तथा नाट्य प्रज्ञा प्रतिष्ठानका पूर्व कुलपतिसमेत रहनुभएका सरुभक्तको यो कृतिको मूल्य पाँच सय रुपैयाँ छ । कृतिमा एक हजार पैतालिस वटा मुक्तक छन् ।
कार्यक्रममा नेपाल मुक्तक प्रतिष्ठान बेलायतका अध्यक्ष दुर्गाप्रसाद पोखरेल, आवरण प्रकाशनका प्रबन्ध निर्देशक रमेश पौडेल, मुक्तक मञ्च केन्द्रीय समिति पोखराका अध्यक्ष रामजीप्रसाद आचार्य, मञ्चका सल्लाहकार रुपिन्द्र प्रभावी, सचिव नवीन भण्डारी लगायतले बोल्नुभएको थियो ।
