पाटन स्वास्थ्य विज्ञान प्रतिष्ठानमा कार्यरत बालरोग विशेषज्ञ प्रा.डा सिर्जना श्रेष्ठको भोलि कोही नआउन्जेलसम्म कविता संग्रह , बाल आँखा रोग विशेषज्ञ प्रा डा सविना श्रेष्ठद्धारा लिखित ‘एउटा जीवन छामेर हेर्दा’ नामक बुबाको बारे लेखिएको पुस्तक तथा पूर्व प्रशासक समेत रहेकी मोती शोभा श्रेष्ठका छुट्टाछुट्टै कृति पूर्व प्रधानमन्त्री तथा साहित्यकार लोकेन्द्र बहादुर चन्दले विमोचन गरिएको हो । आ–आफ्नो क्षेत्रमा स्थापित दुई डाक्टर दिदी बहिनी र उनीहरूका आमाको कृति एकै पटक विमोचन भएको छ ।
प्रा.डा सिर्जना श्रेष्ठको कविता संग्रहमा ५० वटा कविता रहेका छन्। जसमा सामाजिक विभेद तथा महिला सशक्तीकरण जस्ता विषय समेटिएका छन् । डा सविनाले आफ्नै बुवा जो नेपाल सरकारका पूर्व सचिव समेत हुन् उनको जीवनका बारेमा लेखेकी हुन् । यसै गरी मोती शोभा श्रेष्ठले लघु कथा संग्रह ”चियाको चुस्की सार्वजनिक गरेकी छिन्। जसमा ६० वटा कथा समेटिएका छन्।
कार्यक्रममा साहित्यकार कालीप्रसाद रिजालले साहित्य सिर्जना गर्ने विषयमा जुनसुकै विषय र विज्ञ भए पनि इच्छा भएमा रोकिँदैन भन्ने कुरा श्रेष्ठ परिवारले प्रमाणित गरेको बताए यसै गरी अर्का साहित्यकार तथा पूर्व अर्थमन्त्री शंकर कोइरालाले एकै परिवारका सबै जना साहित्यमा लाग्नु भनेको विरलै हुने भन्दै सबैको आ आफ्नो क्षमता रहेको जिकिर गरे ।
यसै गरी साहित्यकार शिव गोपाल रिसालले आज विमोचन भएका कविता कथा र पुस्तक तीनै विधा आ आफ्नो क्षेत्रको अब्बल कृति रहेको जिकिर गरे ।
डा दिदी बहिनी तथा आमा मोती शोभा यो क्षेत्रमा नयाँ नाम भने होइनन् । यसअघि मोती शोभाले ४ वटा उपन्यास प्रकाशित गरिसकेकी छिन् । यसै गरी डा सिर्जना श्रेष्ठका पनि दुई कविता संग्रह प्रश्न चिन्ह देखि पूर्ण विरामसम्म र बादललाई के थाहा प्रकाशित भइसकेको छ । त्यस्तै डा सविनाले पनि जिन्दगी एक प्रश्न चिन्ह र मनको स्पर्श२ वटा कृति ल्याइसकेकी छिन् । भने उनले आफ्नो एकल चित्र कला प्रदर्शनी पनि गरि सकेकी छिन् । डा सविनाले यस पटकदेखि गायनमा पनि हात हालेकी छिन् । उनको स्वर रहेको मलाई सुनको हार हैन प्यार भए पुग्छ नामक म्युजिक भिडियो सार्वजनिक गरिएको छ ।
