संस्कृतिविद् सत्यमोहन जोशीको जीवनीमा आधारित पुस्तक ‘सत्यमोहन’लाई ‘उत्तम-शान्ति पुरस्कार’ प्रदान गरिने भएको छ। उत्तम कुँवर स्मारक पुरस्कार गुठीले २०७८ सालको ‘उत्तमशान्ति पुरस्कार’का निम्ति २०७८ सालभरिमा प्रकाशित भएका गैरआख्यान कृतिहरूमध्ये गिरिश गिरीद्वारा लिखित ‘सत्यमोहन’ नामक आत्मकथात्मक कृतिलाई प्रदान गर्ने भएको छ ।
गुठीले, उक्त पुस्तकको अन्तर्वस्तु शताब्दीपुरूष सत्यमोहन जोशीको एक शताब्दी लामो जीवनयात्रासँग सम्बद्ध रहेको र यसको सिर्जनात्मक पुनर्लेखन गिरिश गिरीले गरेको हुनाले कृतिनायक शताब्दीपुरुष सत्यमोहन जोशी र कृतिकार गिरिश गिरीलाई २०७८ सालको ‘उत्तम शान्ति पुरस्कार’ संयुक्तरूपमा समर्पण गर्न लागिएको जानकारी गराएको छ ।
२६ वर्षको उमेरमै ‘श्रष्टा र साहित्य’ नामक पुस्तकका लागि मदन पुरस्कार प्राप्त गरेका साहित्यिक पत्रकार उत्तम कुँवरको ४३ वर्षकै उमेरमा २०३९ सालमा निधन भएको थियो । वि.सं. २०४४ सालमा स्थापित ‘उत्तम कुँवर स्मारक पुरस्कार गुठी’ ले आख्यानमुक्त गद्यकृतिलाई २०४४ सालदेखि नै ‘उत्तमशान्ति पुरस्कार’ प्रदान गर्दै आइरहेको छ । पुरस्कारको राशी १ लाख रुपैयाँ रहेको छ । पुरस्कार यही जेठ १२ गते समर्पण गरिने गुठीद्वारा प्रेषित विज्ञप्तिमा जनाइएको छ ।
संस्कृतिविद् सत्यमोहन जोशी र गिरिश गिरीलाई उत्तम शान्ति पुरस्कार
