काठमाडौं महानगरपालिकाका मेयर बालेन्द्र शाह (बालेन) ले जन्मदिनको अवसर पारेर कवितासंग्रह ‘अश्र’ सार्वजनिक गरेका छन् । हिपहप र र्याप गायनबाट नेपाली सङ्गीतमा उदाएर स्वतन्त्र राजनीतिज्ञ भई काठमाडौँ महानगरपालिकाको मेयर बनेका बालेन शाहले सामाजिक सञ्जालमा शुक्रबार कविता संग्रहको एक तस्बिर सार्वजनिक गर्दै जन्मदिनको शुभकामना दिने सबैलाई धन्यवाद समेत दिएका छन् ।
‘अश्र’मा बालेनले रचना गरेका एक सयभन्दा बढी कविता संग्रहित छन् । संग्रहको पहिलो खण्डमा प्रेम, दोस्रोमा प्रेम–वियोग, तेस्रोमा राजनीति र चौथोमा दर्शनसम्बन्धी छोटा–छोटा कविता समावेश छन् ।
कविता संग्रह अश्रमा लेखिएको छ-
‘तिम्रो माया मधेशको गर्मी
पसिना-पसिना हुन्छु म
तिम्रो अँगालो हिमालको धर्ती
असिना-असिना हुन्छु म’
स्वतन्त्र उम्मेदवार बनेर काठमाडौं महानगरपालिकाको मेयरमा विजयी बालेनले अश्रको पछिल्लो कलेवरमा लेखिएको छ-–
‘एक अक्षरबाट शब्द
अनि मन्त्र भएँ म
तिमिले मायाले बाँध्यौ
अनि स्वतन्त्र भएँ म’
कविता संग्रहका हरेक पृष्ठमा कवितासँग मिल्दा स्केच पनि समावेश गरिएका छन् । ६६६ रुपैयाँ मूल्यको कवितासंग्रह बुकहिल पब्लिकेसन प्रालिले प्रकाशन गरेको हो ।
