नियात्रा लेखन र बाल साहित्यमा स्थापित स्रष्टा बिन्दु सुवेदीले आफ्नो २ महिने युरोप यात्राका डायरी, स्मृति र अनुभूतिलाई समेटेर ‘युरोप यात्राका संस्मरण’ कृति ल्याएकी छिन् ।
बुधबार आयोजित एक समारोहमा नियात्राकार प्राध्यापक अन्जना वस्ती भट्टराईले विमोचन गरेकी थिइन् । आफूले सन् २०१८ जुलाईदेखि युरोपका फ्रान्स, जर्मनी, हंगेरी, स्विजरल्यान्ड, अस्ट्रिया, इटलीसहितका मुलुकमा गरेको यात्रामा निजात्मक अनुभव–अनुभूति भरेर यो कृति लेखिएको सुवेदीले जानकारी दिइन् ।
बर्लिन पुगेर कलाकार डाली भेटेको अनुभूतिदेखि कलाको राजधानी भेनिस पुग्दासम्मको क्षणलाई उनले अलौकिक व्याख्यान भरेर लेखेकी छिन् ।
सुवेदीका यसअघि ‘जापानमा एक वर्ष’(यात्रा), कुइराको घर(बालकथा), अंशुको यात्रा(बाल उपन्यास), मेरी दिदी र ऊ(कथा संग्रह)सहितका कृति प्रकाशित छन् ।
समारोहमा साहित्यिक संस्था गुन्जनकी अध्यक्ष जलेश्वरी श्रेष्ठ, साहित्यकार श्रीओम श्रेष्ठ रोदनसहितले नियात्राकार सुवेदीको सृजनशिलतामाथि टिप्पणी गरेका थिए । नियात्राकारका छोरा सलिल सुवेदी र गिरिश सुवेदीले भिन्न सांगीतिक प्रस्तुति गर्दै लेखक आमाको स्वागत गरेका थिए । ‘युरोप यात्राका संस्मरण’ कृति झापास्थित सेर्गेम प्रकाशन गृहले प्रकाशित गरेको हो ।
