कसरी हाँस्न मिल्छ र ?

थारैमात्र रहे भैँसी पाल्नुको हुन्छ अर्थ के ?
सुकेको रूखमा पानी हाल्नुको हुन्छ अर्थ के ?
उम्रिदैन भने बीज बारीमा किन छर्नु र ?
गरिमाहीन मान्छेमा लगानी किन गर्नु र ?
।।१।।
निकालिन्न भने केही खानीको हुन्छ अर्थ के ?
खोलैखोला बगी जाने पानीको हुन्छ अर्थ के ?
सुन हैन भनी जाने आगोमा किन गाल्नु र ?
खोटो सिक्का टिपी व्यर्थै खल्तीमा किन हाल्नु र ?
।।२।।
बसिँदैन भने ठूलो घरको हुन्छ अर्थ के ?
बोकिँदैन भने भारी बलको हुन्छ अर्थ के ?
लुगा कोचेर बाक्सामा नाङ्गो भै हिँड्न मिल्छ र ?
जनको स्वप्नकोे वृक्ष चटक्कै गिँड्न मिल्छ र ?
।।३।।
चम्किँदैनन् भने राति ताराको हुन्छ अर्थ के ?
फल नपाइने सारा नाराको हुन्छ अर्थ के ?
आमाको पटुकाको त्यो नासो के मास्न मिल्छ र ?
देश नै शोकमा देख्छु कसरी हाँस्न मिल्छ र ?
।।४।।