काठमाडौं विश्वविद्यालयले नौ जना काभ्रेली प्रतिभालाई सम्मान गरेकाे छ । विसं. २००७ साल अघि काभ्रेपलाञ्चोक जिल्लामा जन्मिएर हालसम्म साधनारत रहेका नौ जना प्रतिभाहरूलाई सम्मान गरेको हाे ।
सम्मानित हुनेहरूमा मूर्तिकार ठाकुरप्रसाद मैनाली, गीतकार किरण खरेल, चलचित्रकर्मी यादव खरेल, साहित्यिक पत्रकार मोहन दुवाल , महाकाव्यकार रमेश खकुरेल, कवि वंशी श्रेष्ठ, बालसाहित्यकार कन्हैया नासननी, ललितकलाकार के. के. कर्माचार्य, र गायक मच्छेश्वर सापकोटा हुन् । सम्मानित प्रतिभाहरुलाई विश्वविद्यालयका संस्थापक उपकुलपति डा. सुरेशराज शर्मा, कूलपति डा. भोला थापा तथा रजिष्टार डा. अच्युत वाग्लेले दोसल्ला , सम्मानपत्र र मायाको चिनो प्रदान गरिएको थियो ।
कार्यक्रममा प्रमुख अतिथि काठमाडौं विश्वविद्यालयका संस्थापक उपकुलपति डा. सुरेशराज शर्माले सम्मानित हुनेहरुको योगदानको चर्चा गर्दै उहाँहरु काभ्रेका मात्र नभइ देशकै प्रतिष्ठित व्यक्तित्व रहनुभएको बताए ।
कार्यक्रममा विश्वविद्यालयका उपकूलपति डा. भोला थापाले काभ्रे आफैंमा साधकहरुको जन्मभूमी भएकाले हरेक क्षेत्रमा रहेका व्यक्तित्वहरुलाई उत्तिकै महत्व दिएर आगामी दिनहरुमा पनि यसरी नै सम्मान गर्न विश्वविद्यालय अग्रसर रहेको बताए। सबै क्षेत्रमा रहेर योगदान पुर्याउनु हुनेलाई विश्वविद्यालयले गर्ने सम्मानलाई निरन्तरता दिइने पनि उनले जानकारी दिए । उपस्थितहरुलाई विश्वविद्यालयका रजिष्टार डा. वाग्लेले स्वागत गर्नुभएको थियो भने कार्यक्रम साहित्यकार हरि मञ्जुश्रीले संचालन गरेका थिए ।
