कुमार नगरकोटीको नयाँ ग्राफिक नोभल ‘जे थर्टी–थ्री’ शिल्पी थिएटरमा एक नाटकीय प्रस्तुतिमार्फत मञ्चन गरिएको छ । उक्त अवसरमा शिल्पी थिएटर ग्रुपले उक्त ग्राफिक नोभलको अंशमा आधारित साङ्गीतिक नाटक प्रस्तुत गरेको थियो । नाटक हेर्न दुई सयभन्दा बढी दर्शक आएका थिए ।
नाटकमा नोभलका विभिन्न पात्र रङ्गमञ्चमा जीवन्त बनी आएका थिए । डा. वाग्ले र जङ्गबहादुर राणाका अङ्गरक्षकलगायत नोभलका पात्रहरूसँग दर्शकलाई परिचय गराइएको थियो । नाटकले दर्शकलाई वैकल्पिक संसारमा पुर्यायो, जहाँ जङ्गबहादुर राणा अझै पनि काठमाडौं सहरमुनिको काल्पनिक सहर वर्ल्ड हेरिटेज प्लाजामा जीवित छन् । हरेक वर्ष जङ्गबहादुर राणाका अङ्गरक्षक नयाँ ग्रेगोरियन क्यालेन्डर किन्न काठमाडौं आउने गर्छन् । सोही सन्दर्भमा डा. वाग्लेले नोभलका केही कथा दर्शकलाई सुनाउँछन् ।
नाटकीय प्रस्तुतिले नयाँ उपन्यासप्रतिको उत्सुकतालाई झनै बढाएको थियो । दर्शकहरूले उक्त प्रस्तुतिलाई निकै मन पराएका थिए । नाटक सकिएपछि लेखक कुमार नगरकोटीले धन्यवाद मन्तव्य राखे । नोभल निर्माणमा लामो समय लागेको उनको भनाइ छ । ‘नेपाली साहित्यमा ग्राफिक नोभलको पनि परिचय दिनुपर्छ भन्ने मलाई सधैं लाग्थ्यो । त्यसैले ‘जे थर्टी–थ्री’ लेख्न थालें,’ उनले भने ।
‘मेरो लेखन यात्रा २५ वर्ष पुगेको छ । यस यात्रामा साथ दिनुहुने सबैलाई धन्यवाद,’ उनले भने । पुस्तक विमोचनलाई यस्तो रचनात्मक रूपमा मनाउन पाउँदा खुसी लागेको पनि उनको भनाइ छ । आफ्नो नयाँ प्रोजेक्टका रूपमा नेपाली चलचित्र लेखिरहेको पनि उनले जनाए ।
कुमार नगरकोटी कवि, निबन्धकार, उपन्यासकार, लघुकथा लेखक हुन्, जो आफ्नो भिन्न जीवनशैली र कथाका लागि परिचित छन् ।
