तिम्रो दिलको सफा चित्रमा
अन्तरमनको स्ट्याम्प लगाइ
भोट दिइसकेपछिको
तिम्रो र मेरो मौनता
अझै खुलेको छैन
तिमी पनि मौन
म पनि मौन
कहिल्यै विजय नहुने
कहिल्यै हार नहुने
कहिल्यै नटुङ्गिने
तिम्रो र मेरो अन्तर मनको निर्वाचन
अनि यो मौनता
यही मौनतामा बाचेका
हामी मतपेटिका
निर्वाचन अधिकृतको हस्ताक्षर बिना
मौनतामै खसालिएका एक एक भोट
त्यही बराबरीको परिणामले
न जित्न सकेका
न हार्न सकेका
केवल मौन
तिमी पनि मौन
म पनि मौन
निर्वाचन आयोगको
आज्ञा विनाको यो मौनता
यही मौनतामै रमाएका तिमी र म
दुवैले एकै भाकल गरेका छौ होला
यो मौनता कहिल्यै नटुङ्गियोस
मौनता नै जिन्दगीको
उपलब्धी सम्झने
हाम्रा एक जोडी मनहरु
बन्द कोठाभित्रको आँखीझ्यालबाट
फुत्त बाहिर निस्कन्छन्
अनि भेट्दछन्
मौनतामै भलाकुसारी गरी
फर्किन्छन बन्द कोठाभित्रै
आधा बन्द गरिएका
आँखाका परेलीको तस्वीर बोकेर
कहिले सन्तुष्ट नहुने
कहिले असन्तुष्टि नजनाउने
कहिले समर्थन नगर्ने
कहिले विरोध नहुने
विना एजेन्डाका हाम्रा बैठक
निर्णय बिना फर्किन्छन् मौनतामै
न शान्ति हुने
न अशान्ति हुने
न अवधि बढाउन मिल्ने
न अवधि पुरा हुने
तिम्रो र मेरो मौनता
अझै खुलेको छैन
तिमी पनि मौन
म पनि मौन ।
