साहित्यकार तथा पत्रकार पेशल आचार्यको ब्रेन ट्यूमर तथा क्यान्सरको कारण निधन भएको छ । उपचारको सिलसिलामा मेडिसिटी अस्पतालमा साउन १ गते आचार्यको निधन भएको हो ।
आचार्यलाइ अन्नपूर्ण न्यूरोमा ४ पल्टसम्म शल्यक्रिया गरे पनि सुधार नभएपछि २८ असारमा मेडिसिटी अस्पताल भर्ना गरिएको थियो ।
आचार्यको जन्म वि.सं २०२४ साल भदौ २२ गते हरितालिकाका दिन मोरङ जिल्लाको बरगाछीमा भएको थियो । उनले कक्षा ८ मै हुँदा वि.सं २०३६ सालमा “गरिब” शीर्षकको कविता रचना गरेका थिए । उनको पहिलो प्रकाशित रचना “दुई मुक्तक” टुटुल्को हास्यव्यङ्ग्य पत्रिकामा वि.सं २०४२ सालमा प्रकाशित भएको थियो ।
आचार्यका प्रकाशित कृतिहरूमा बालकविता सङ्ग्रह कमिलाको ताँती (२०६०), विद्यालय स्तरीय निबन्धहरू (२०६५) , बाल निबन्ध किस्ताको कम्प्यूटर (२०६६), बाल कविता जून आमा जून(२०६९), मनको दैलो खोल (२०६९), साहित्यकार पवन चामलिङसँग १०१ प्रश्न (२०६९), पृथक अभियानमा र साहित्यकार अशोक सुवेदी (२०७२), आधारभूत निबन्ध (२०७५), माध्यमिक निबन्ध (२०७५), ब्याक बेञ्चर (२०७५) लगायत रहेका छन् ।
