चेतना जगाउने बाल चित्रपुस्तक ‘नचिनेको मान्छेसँग जाँदिनँ’ सार्वजनिक भएको छ। कथालय इन्कले प्रकाशन गरेको चित्रकथाकी लेखक डाग्मा ग्याइस्लर हुन्, यसलाई नेपालीमा अनुवाद कथालयकी कार्यकारी अधिकृत सुनिती अमात्यले गरेकी हुन्।
यो साराको कथा हो । उनलाई आमाबाबाले चिनेका मान्छेको मात्रै विश्वास गर्नु भनेका हुन्छन्। एक दिन स्कुल छुट्टी भएपछि उनी कसैको पर्खाइमा हुन्छिन्। विभिन्न महिला/पुरुषहरू सारालाई ‘आऊ म घर पुर्याइदिन्छु’ भनेर आग्रह गर्छन् तर उनी मान्दिनन्। बरु भिजेरै बस्छिन्। आमाबाबाले सूची बनाएका हुन्छन्। सूचीमा भएकाले मात्रै सारालाई स्कुल छुट्टीपछि घर लैजान सक्छन्। फकाउने मानिसहरूबारे साराको मनमा के खेल्छ, सूचीमा भएकै मान्छे आउलान्? कथा यस्तै जिज्ञासाले भरिएको छ।
कथाले बालमनोविज्ञानलाई कलात्मक ढंगले समेटेको अनुवादक अमात्यले बताइन्। १९८७ मा आफ्नो पहिलो बाल पुस्तकमा चित्र बनाएकी लेखक तथा चित्रकार ग्याइस्लरका प्रायः पुस्तकले संवेदनशील मुद्दाको उठान गर्छन्। शैक्षिक चेतना र उत्साहलाई पनि उनले आफ्ना कथामा जोड दिने गरेकी छन्।
