शिक्षाविद् रमेशप्रसाद गौतमद्वारा लिखित पुस्तक ‘शिक्षा र नागरिक शिक्षा’ एक कार्यक्रमकाबीच लोकार्पण गरिएको छ ।
पद्मोदय स्कुलको सभाकक्षमा आयोजित कार्यक्रममा शिक्षाविद् केदारभक्त माथेमा लगायतले पुस्तक सार्वजनिक गरे । पुस्तक सार्वजनिक गर्दै प्रमुख अतिथि माथेमाले गौतमको पुस्तकमा उनको ४० वर्षको शिक्षा क्षेत्रको अनुभव अभिव्यक्त भएको बताए ।
‘असल नागरिक बनाउने भनेकै नागरिक शिक्षाले हो’ भन्दै माथेमाले अहिलेको शिक्षा निजीकरणका नाममा व्यापारीकरण भएकोमा चिन्ता व्यक्त गरे ।
कार्यक्रमका सभाध्यक्ष प्रा.डा. जयराज आचार्यले शिक्षाको स्तर खस्किँदै गएको उल्लेख गर्दै नेपालको शिक्षाप्रति विश्वासको संकट बढ्दै गएको बताए । उनले त्रिभुवन विश्वविद्यालयलाई राजनीतिक दलको भागबण्डाले गाँजेकोमा दुःख व्यक्त गर्दै भारतको बिहारमै पनि त्यस्तो काम नभएको चर्चा गरे ।
कार्यक्रममा कृतिकार गौतमका साथै डा. विद्यानाथ कोइराला, डा. पद्म देवकोटा, दीपेन्द्रपुरुष ढकाल, शर्मिला पोखरेल लगायतले नेपाली शिक्षा पद्दतीकाबारेमा बोले ।
पुस्तक सुन्दर स्वदेश पब्लिकेशनले प्रकाशित गरेको हो । पुस्तकको मूल्य ४५० रुपैयाँ रहेको छ ।
