पूर्णमान शाक्य स्मृति कला प्रतियोगिताको दोस्रो संस्करणबाट पौभा पेन्टिङ र मूर्तिकला विधाका ६ कलाकार पुरस्कृत भएका छन् । पौभातर्फ रामप्रकाश श्रेष्ठको ‘आर्यतारा’ले प्रथम, प्रिया शाक्यको ‘भाइरोचना बुद्ध’ले दोस्रो र अमृत डंगोलको ‘अष्टमात्रिका’ले तेस्रो पुरस्कार जितेका छन् । मूर्तितर्फ निरोज शाक्यको ‘शाक्यमुनि बुद्ध’ प्रथम, वीरेन्द्र शाक्यको ‘पद्मसम्भव’ दोस्रो र राजीव तण्डुकारको ‘चक्रसम्भरा’ले तेस्रो पुरस्कार पाएका छन् । प्रथम हुनेलाई ५० हजार, दोस्रो हुनेलाई २० हजार र तेस्रो हुनेलाई १० हजार नगदसहित प्रमाणपत्र र मेडलले दिइएको हो । प्रतियोगिताका अन्य सहभागीहरुलाई प्रमाणपत्र दिइएको छ ।
वोधिसत्व फाउन्डेसनले शनिबार कार्यक्रम गरेर ललितपुर महानगरपालिकाकी उपमेयर मञ्जली शाक्य बज्राचार्यद्वारा पुरस्कार वितरण गरिएको थियो । कलाप्रेमी पूर्णमान शाक्यको स्मृतिमा उनको परिवारले वोधिसत्व फाउन्डेसनअन्तर्गत गत वर्षदेखि यो प्रतियोगिता गराउँदै आएको छ । परम्परागत, मौलिक संस्कृति र सम्पदाले धनी नेवार समुदायको कलाको संरक्षण, सवर्द्धन र उत्थान पुग्ने उद्देश्यले प्रतियोगिता गराउँदै आएको वोधिसत्व इन्टरनेशनलकी सहसंस्थापक अञ्जना शाक्यले बताइन् । उनी पूर्णमानकी श्रीमती हुन् । प्रतियोगितामा समावेश कलाकृतिहरुको सिर्जनशील, रचनात्मक, रंग समिश्रण लगायतका मापदण्डका आधारमा निर्णायकले छनोट गरेको उनले बताइन् ।
ललितपुरको पाटनमा जन्मिएका पूर्णमानको पित्तथैली समस्याका कारण तीन वर्षअघि ५८ वर्षको उमेरमा निधन भएको थियो । कला संरक्षणमा पूर्णमानको सपनालाई पूरा गर्न भन्दै उनको परिवारले पाँच महिनाअघि पूर्ण म्युजियम अफ नेवा आर्ट स्थापना गरे ।
पूर्णमान शाक्य स्मृति कला प्रतियोगितामा सामेल गरिएका पौभा र मूर्तिहरुको कुपण्डोलस्थित वोधिसत्व ग्यालरीमा प्रदर्शनी भइरहेको छ । प्रदर्शनी माघ २९ गतेसम्म चल्नेछ ।
तस्बिरहरु : बोधिसत्व ग्यालेरीको फेसबुक वालवाट
