लघुकथाकार निशा केसीको लघुकथा सङ्ग्रह ‘ओजन’ को लोकार्पण भएको छ । स्रष्टा समाज नेपालले आयोजना गरेको कार्यक्रमका प्रमुख अतिथि प्रा.डा. लक्ष्मणप्रसाद गौतमलगायतले सो कृतिको लोकार्पण गर्नुभयो । कार्यक्रमका अतिथिहरुलाई डा. सदानन्द कडेलले स्वागत गर्नुभएको थियो भने मधु पाठकले कार्यक्रम सञ्चालन गर्नुभएको थियो ।
कार्यक्रममा प्रमुख अतिथि गौतमले केसीका लघुकथा सिद्धान्तमै रहेको बताउनु भयो । केसीका लघुकथाको अन्त्यले पाठकको मनमा झङ्कार दिने उहाँले बताउनु भयो । लघुकथा समाजका अध्यक्ष गोपाल अष्कले केसी पछिल्लो समय मुक्तकमा नाम कमाए पनि उहाँको पहिलो परिचय कथाकारको नै भएको उहाँको भनाई थियो ।कार्यक्रममा मन्दिरा मधुश्री र रिता खत्रीले संग्रहका लघुकथा वाचन गरेर सुनाउनु भएको थियो ।
कृतिको समीक्षा गर्दै डा. ज्ञानु पाण्डेले लघुकथाले प्रेम, चेतनाको आगो, समाजको वर्तमान अवस्था आदि समेटेको उहाँँको भनाई थियो । साहित्यकार विवश पोखरेलले ‘ओजन” का लघुकथाहरु निक्कै गहन र मनन योग्य रहेको उहाँको भनाई थियो । लघुकथाकार निशा केसीले संग्रहित लघुकथाको रचनागर्भ खोतल्नु भयो । कार्यक्रमको समापन गर्दै सभाध्यक्ष श्रीओम श्रेष्ठ रोदनले स्रष्टा समाजले प्रकाशन गरेको यो कृति ३४ औं भएको जानकारी दिनुभयो ।
