२०३५ साल माघ २० गते पहिलो पटक पोखरामा टिकटमा मुक्तक कार्यक्रम गरेको पोखरेली युवा सांस्कृतिक परिवारले फेरि त्यो इतिहासलाई जोड्ने काम गरेको छ ।‘मुक्तक सुन्न पोखरा जाऔँ’ भन्ने भनाइ स्थापित गरेको पोखरामा मुक्तक सुन्न १ हजार रुपैयाँसम्म टिकट काटेर सयौँ पारखी उपस्थित थिए ।
करिब २ घण्टा चलेको कार्यक्रममाकार्यक्रममा कास्की, स्याङ्जा, तनहुँ, लमजुङ, पर्वत, गुल्मी, काठमाडौं र रुपन्देहीका गरी २९ स्रष्टाले मुक्तक सुनाए । भैरहवाबाट बुँद राना र रुद्र ज्ञवाली आइपुगेका थिए । अमृता पोख्रेलबाट सुरु भएको मुक्तक बाचन सरुभक्तको बाचनसँगै मैझारो भएको थियो । श्रीराम अधिकारी ‘गोर्जे’, सञ्जीव पौडेल, अमृत सुवेदी, रामजीप्रसाद आचार्य, कृष्ण सुवेदी, सावित्री गिरी, रुपिन्द्र प्रभावी, कपिल शर्मा, प्राञ्जल, सरला लामिछाने ‘सरु’, जीवनसागर भण्डारी, डा भूमिराज बस्ताकोटी, शिव त्रिपाठी, गौरी तमु, लक्ष्मण थापा, मन क्षेत्री, सरस्वती श्रेष्ठ (सरु), सुरेश रानाभाट, दीपक समीप, डा ईश्वरमणि अधिकारी, सरस्वती प्रतीक्षा, रमेश श्रेष्ठ, रुद्र ज्ञवाली, रामकाजी कोने, विश्वविमोहन श्रेष्ठ, उषा शेरचन, बुँद रानाले मुक्तक सुनाएका थिए । कार्यक्रमलाई पोखरा महानगरपालिकाले प्रवद्र्धन गरेको थियो । पोखरा प्रज्ञा प्रतिष्ठानले पनि कार्यक्रमलाई सहयोग गरेको थियो ।
आयोजक संस्था पोखरेली युवा सांस्कृतिक परिवारका अध्यक्ष उपेन्द्र पौडेल विश्वव्यापी रूपमा मुक्तक लेखन र सशुल्क कविता कार्यक्रममा आएको गतिको पृष्ठभूमि २०३५ सालको टिकटमा मुक्तक कार्यक्रमको ठोस योगदान रहेको दाबी गर्छन्।
विगतमा २ रुपैयाँ टिकटमा मुक्तक कार्यक्रम भएको त्यसबेला मुक्तक सुनाएका मुक्तककारले स्मरण गरे। साहित्यको श्रीवृद्धिका लागि आफूहरूले यो कार्यक्रमलाई निरन्तरता दिइएको अध्यक्ष पौडेलले बताए। पोखरा महानगरपालिकाका प्रमुख धनराज आचार्यले उद्घाटन गरेको कार्यक्रमको संचालन संस्था उपाध्यक्ष रीता अधिकारीले गरेकी थिइन्।
सरुभक्त, उषा शेरचन लगायतकै नेतृत्वमा पोखरामा पहिलो पटक २०३५ सालमा मुक्तक वाचनको थालनी भएको थियो ।
